भांगरभूंय | प्रतिनिधी
पणजीः राज्यांतल्या मटण विक्रेत्यांक नातलां निमतान गोरवांचें मास (बीफ) उणें जावचें न्हय म्हूण गोंय मास प्रकल्पान दोन दिसांत 12 टन गोरवांचें मांस उपलब्ध करपाची वेवस्था केल्या. हेर राज्यांतल्यान गोरवां हाडून तांची कत्तल करपाची वेवस्था मास प्रकल्पांत आसा.
गोंय मास प्रकल्पाचे वेवस्थापकी संचालक डॉ. राजेश केणी हांणी ही म्हायती दिली. कार्यकर्ते आनी कांय संघटणांनी दिल्ल्या धमक्यांक लागून गोंयच्या विक्रेत्यांक बीफ मेळप कठीण जालां. बिफाचो सांठो मेळ्ळो ना, जाल्यार दुकानां बंद दवरपाची शिटकावणी मासाची विक्री करपी वेपाऱ्यांनी दिल्ली. नाताल ही ख्रिस्ती भावांची मुखेल परब. ख्रिस्ती तशेंच कांय समाजाचे लोक नातलाक बिफाचें मास (गोरवांचें मास) खातात. हाका लागून नातलां तशेंच नव्या वर्साक बिफाक सगल्यांत चड मागणी आसता. ख्रिस्ती लोकांक बीफ उपलब्ध जावचें आनी वेपारी/दुकानदारांक वेवसाय जावचो म्हूण सरकारान फावो ती तजवीज केल्या.
गोंय मास प्रकल्पांत मंगळारा 33 जनावरांचें 3 ट्रक पावले. हाका लागून गोरवांची कत्तल जावन मास उपलब्ध जालें. नातलां दिसा गोरवांचें आनीक 5 ट्रक येवपाचे आसात. एका ट्रकांत 11 गोरवांचो आस्पाव आसता. ह्या दोन दिसांत 12 टन मास (बीफ) विक्रेत्यांक उपलब्ध जातलें. उच्च न्यायालयाच्या आदेशा प्रमाण गोरवांची तपासणी जावन मास उपलब्ध करपाची वेवस्था गोंय मास प्रकल्पांत आसा. गोंय मास प्रकल्पा कडेन 70 नोंदणीकृत विक्रेते आसात. ह्या सगल्यांक मास उपलब्ध करून दितले, अशें डॉ. राजेश केणी हांणी सांगलें.
गोरवांचें मास (बीफ) उपलब्ध करून दिवपा विशीं मुख्यमंत्री डॉ. प्रमोद सावंत हांणी गोंय मास प्रकल्पाक योग्य ते आदेश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
