भांगरभूंय | प्रतिनिधी
भांगरभूंय । प्रतिनिधी
पणजीः न्हंयेचे प्रदुशण आडावपा खातीर ‘नमामी गंगे’ ह्या उपक्रमा खाला गोंयच्यो दोन न्हंयो मांडवी आनी जुवारी ह्या न्हंयांची निवड जाल्या. ह्या न्हंयांच्या नितळसाणे खातीर केंद्रातल्यान 95 कोटी निधी मंजूर जाला. पूण, तांतूतलो फकत 28 कोटी खर्च केला, अशी म्हायती जल शक्ती मंत्रालयान दिल्या.
राज्यसभेच्या लेखी उत्तरात जाप दितना केंद्रीय जल शक्ती राज्य मंत्री राज भुषण चौधरी हांणी सांगले, नमामी गंगे खाला राष्ट्रीय उदक दर्जो देखरेख उपक्रमाच्या देखरेख स्टेशना वरवीं केंद्रीय प्रदुशण नियंत्रण मंडळ, राज्यांचे प्रदुशण नियंत्रण मंडळ न्हंयेच्या उदकाच्या दर्ज्याचेर नदर दवरता. जो परिणाम उदाकाच्या दर्जाचे नदर दवरले उपरांत आयला त्याचे वेळावेळार केंद्रीय प्रदुशण नियंत्रण मंडळ देखरेख दवरता.
नमामी गंगे उपक्रमा खाला भारत सरकारान आर्थीक वर्स 2019-20 ते 2024-25 खातीर 10,775 कोटी मंजुर केल्यात. तांतूत न्हंय संवर्धन आराखड्या खाला 1244 कोटी मंजूर केल्यात. तांतूतले 95.23 कोटी गोंयाक मंजूर जाल्यात. सरकारान ह्या मांडवी आनी जुवारी दोनूय न्हंयेचे प्रदुशणाचेर नियंत्रण दवरपा खातीर 28.93 कोटी खर्च करून ह्या न्हंये देगेंक 12.50 एमएलडी क्षमतेचे सिवेज प्रक्रिया प्रकल्प उबारल्यात.
केंद्रीय प्रदुशण नियंत्रण मंडळान दिल्ल्या अहवाला प्रमाण मांडवी न्हंयचो आमोणा वाठारांतलो भाग आनी जुवारी न्हंयचो पंचवाडी ते मडकय मेरेनचो भाग बरोच प्रदुशित आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
