भांगरभूंय | प्रतिनिधी
श्रीशांतादुर्गा फातर्पेकान्न देवस्थान समिती: उपजिल्लोधिकार्या वांगडा जाल्ले बसकेंत दिलें स्पश्टीकरण
मडगांव : फातर्पेंच्या शांतादुर्गा फातर्पेकान्न देवस्थान समितीच्या पदाधिकार्यांनी केपें उपजिल्लोधिकारी मनोहर कारेकार हांचे अध्यक्षते खाला जाल्ले बसकेंत खंयच्याच समाजाचेर बंदी घालपाचो अधिकृत थाराव वा निर्णय देवस्थानाचे बसकेंत जावंक ना अशें सांगलें.
फातर्पेंच्या श्रीशांतादुर्गा फातर्पेकान्न देवस्थाना वतीन मुस्लिम धर्मांतल्या लोकांक जात्रे वेळार दुकानां लावपाक दिवचे नात, अशी खबर आयिल्ली. उपरांत समाजमाध्यमांचेर हाचें खर समर्थन करपी आनी विरोधी प्रतिक्रिया गोंयकारांनी उक्तायिल्ल्यो. हेच फाटभूंयेर उपजिल्लोधिकार्यांनी देवस्थान समितीचे पदाधिकारी मंगेश देसाय, संतोष देसाय, आनंद देसाय हांचे सयत मामलेदार नाथन अफोन्सो, कुंकळ्ळी पुलीस उपनिरीक्षक सुदन भोसले हांचे हजेरेंत बसका घेतली.
हे बसके वेळार देवळाच्या समिती वांगड्यांनी सांगलें, ‘दिसाळ्यांनी आयिल्ल्यो खबरो ह्यो वैयक्तीन विधानाचेर आदारून आसात. ती देवस्थान समितीची अधिकृत भुमिका न्हय. देवीची वर्सुकी जात्रा हो जायत्या दसकां पसून ‘सांप्रदायीक शांतीकाये’चें प्रतीक म्हणून मनयतात. जंय विवीध जाती, धर्म आनी पंथांतले भावीक भक्तीभावान देवीचो आशीर्वाद घेवपाक येतात. हो उत्सव सदांच सर्वसमावेशक आसा आनी कसल्याच समुदायाक वांटेकार जावपा पसून केन्नाच आडावंक ना.’
समितीच्या वांगड्यांनी, म्हाजनांच्या बसकेंत जाल्ले चर्चे मजगतीं कांय म्हाजनांनी मुस्लिम समाजांतल्या लोकांक स्टॉल्सांक बंदी करपा विशीं विचार उक्तायिल्ले. ते नोंद केल्ले. मात, कसलेच तरेची प्रवेश बंदी वा विक्रेत्यांवेल्या निर्बंधा विशीं कसलोच औपचारिक थाराव वा निर्णय घेवंक ना. मंदीर ट्रस्टान समुदाय वा हे फाटभुंयेर आदारीत विक्रेत्यांचेर कसलेच विशिश्ट निर्बंद घालूंक नात. देवूळ प्रशासनाचो उद्देश हेर कार्यावळीचें धर्मीक पावित्र्य आनी सुरक्षितताय राखप होच आसा. जाल्यार खंयच्याच समुदाय वा विक्रेत्यां कडेन भेदभाव करपाचो हेत ना.
उपजिल्लोधिकाऱ्या वांगडा जाल्ले बसकेंत तांणी प्रशासन आनी जनतेक आस्वासन दितना सांगलें, ‘उत्सवाचो केंद्रबिंदू सुसंवाद, भक्ती आनी ‘सर्वसमावेशकताय’ आसतलो.’
केपें उपजिल्लोधिकारी मनोहर कारेकार हांणी सांगलें, श्री शांतादुर्गा फातर्पेकान्न देवस्थानाच्या जात्रेंत विशिश्ट समुदायाक प्रवेश बंदी आनी विक्रेत्यांचेर बंदी हे विशींच्या बातम्यां संबंदी चर्चा जावप गरजेचें. खंयच्याच विशेश समुदायाक प्रवेश बंदी कायदेशीर ना. ते तांच्या संवैधानीक अधिकारांचें उल्लंघन आसा.
भारतीय राज्यघटने प्रमाण धर्म, वंश, जात, लिंग ह्या कारणांवेल्यान भेदभाव करपाक सक्त मनाय आशिल्ल्याचो मुद्दो तांणी मांडलो.
केपें मामलेदार नाथन अफान्सो हांणी सांगलें, निर्बंधाक लागून समाजांतल्या आनी सामान्य लोकां मदीं समावेशकताय, निपक्षताय आनी बहिश्कार हे विशीं चिंतेचें वातावरण निर्माण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
