भांगरभूंय | प्रतिनिधी
पणजी ः अनधिकृत बांदकाम मोडटना संबंदीत अधिकाऱ्यांनी आतां सर्वोच्च न्यायालयाच्या आदेशांचें पालन करप सक्तीचें आसा. हांतूत अनधिकृत बांदकाम धारकांक १५ दिसांची नोटीस दिवन आनी सुनावणी घेवन निमाणो आदेश दिवचो अशें सांगलां. तेच बरोबर बांदकाम मोडटाना व्हिडियो रेकॉर्डिंग करप सक्तीचें आसा. विशेश म्हणल्यार मोडिल्लें बांदकाम न्यायालयाच्या आदेशाक पाळो दिना जाल्यार संबंदीत अधिकाऱ्याक तें स्वताच्या खर्चान परतून बांदून दिवचे पडटले अशें परिपत्रकांत नमुद केलां. हें परिपत्रक मुखेल सचीवान जारी केलां.
मजगतीं, बुधवारा १३ नोव्हेंबराक सर्वोच्च न्यायालयात न्यायाधीश बीआर गवई आनी न्यायाधीश के व्ही विश्वनाथन हांच्या खंडपिठान एका प्रकरणाचेर निवाडो दितना खंयचेय बांदकाम १५ दिसांची नोटीस नासतना मोडल्यार संबंदीत अधिकाऱ्याक स्वताच्या खर्चान तें पतरून बांदून दिवचे पडटले अशें सांगिल्लें.
मध्य प्रदेश, राजस्थान आनी उत्तर प्रदेश सरकारांनी वेगवेगळ्या प्रकरणांत आरोपींचीं घरां मातये भरवण केल्ली. सरकाराचे हे कारवाये आड बळी पडपी लोकांनी सर्वोच्च न्यायालयांत याचिका दाखल करून ह्या प्रकारच्या कारवाये खातीर योग्य मार्गदर्शक तत्वां तयार करचीं अशी मागणी केल्ली.
सर्वोच्च न्यायालयान जारी केल्ली मार्गदर्शक तत्वां…
१) बुलडोझर कारवाय करपाचो आदेश दिलो जाल्यार ताचे आड अपील करपाक संबंदीताक वेळ दिवचो.
२) रातभर घरांचेर कारवाय जाता. बायलांक आनी भुरग्यांक रातच्या वेळार भायर काडटात. हें बरें न्हय. देखून बांदकामाचेर रातच्या वेळार कारवाय करपाक फावना.
३) सांगिल्ली मार्गदर्शक तत्वां सरकारी जमीन बळकावून बांदिल्ल्या बेकायदेशीर बांदकामां खातीर न्हय.
४) कारणां दाखोवपाची नोटीस जारी केल्या बगर खंयचेंच बांदकाम मोडचें न्हय.
५) बांदकाम मोडचे पयलीं संबंदीत बांदकाम धनयाक टपालांतल्यान अधिकृत नोटीस धाडची आनी ताची एक प्रत वण्टीचेर चिकटवची.
६) नोटीस धाडल्या उपरांत उण्यांत उणो 15 दिसांचो वेळ दिवपाक जाय.
७) जिल्लो दंडाधिकाऱ्यांक तशेंच तत्सम अधिकाऱ्यांक हें संबंदीत म्हायती दिवची तशएंच कारवाये वेळार तें त्या सुवातेर हजर आसपाक जाय.
८) जिल्लो न्यायदंडाधिकाऱ्यान तशेंच जिल्होधिकाऱ्यान अशा कारवायांचेर नदर दवरपा खातीर नोडल अधिकारी नेमचे.
९) संबंदीतांक जारी केल्ले नोटीशेंत बांदकाम मोडपाचें कारण, संबंदीत प्रकरणाची सुनावणी केन्ना आनी कोणा मुखार जातली हाची म्हायती आसपाक जाय. हाचे वांगडाच सुचोवण्यो आनी आदेश हांचे विशीं म्हायती दिवपा खातीर पोर्टल तयार करचें.
१०) बांदकाम मोडचे पयलीं अधिकाऱ्यांनी वैयक्तीक सुनावणी घेवन ताची नोंद करची. तशेंच निमाणो आदेश दिवन बांदकाम मोडपाची गरज आसा काय ना हेंय स्पश्ट करचें. बांदकाम मोडप हो सदांच निमाणो उपाय अशें मानचें.
११) संबंदीत प्रकरणाची ऑर्डर डिजिटल पोर्टलाचेर उपलब्ध करून दिवची.
१२) बेकायदेशीर बांदकाम मोडपाचो आदेश दिल्या उपरांत संबंदीत व्यक्तीक 15 दिसांची मुजत दिवची. ह्या वेळार संबंदीत व्यक्तीक स्वता बांदकाम काडपाक मेळटलें. जर तशें जावंक ना वा आदेश स्थगीत केलो ना जाल्यार मागीर बांदकाम मातये भरवण करपाची कारवाय करची.
१३) कारवायेचे चित्रीकरण करून ताचो अहवाल पालिका आयुक्तांक धाडचो.
१४) मार्गदर्शक तत्वांक पाळो दिवंक ना जाल्यार तो न्यायालयाचो अवमान थारतलो. तशेंच संबंदीत अधिकारी जापसालदार आसतलो आनी स्वताच्या खर्चान मोडिल्ली इमारत परतून बांदपा वांगडाच हेर लुकसाण भरपाय ताका दिवची पडटली.
१५) सर्वोच्च न्यायालयाचें हें निर्देश सगळ्या राज्यांच्या मुखेल सचीवांक धाडून तें चालीक लावचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
