भांगरभूंय | प्रतिनिधी
नवी दिल्ली, खबरां संस्था ः दूरसंचार कंपनींक आतां आपल्या वापरप्यांक व्हॉयस + एसएमएस पॅकाचो वेगळो पर्याय दिवचो पडटलो. कारण जायते वापरपी फोन फकत कॉल करपा खातीर वापरतात. पूण तांकां सद्याच्या डेटा पॅका वांगडा कॉलिंग + एसएमएस रिचार्ज करचें पडटा, जें खूब खर्चीक आसा. देखून आतां कॉलिंग आनी एसएमएस खातीर वेगळे रिचार्ज प्लॅन आसतलें.
जायते वापरपी दोन सिम वापरतात, एक कॉल करपा खातीर आनी एक इंटरनॅटा खातीर, पूण तांकां दोनूय सिमा खातीर रिचार्ज करचें पडटा. अशे परिस्थितींत सरकार हे खातीर नवे मार्गदर्शक तत्वां हाडपाचो विचार करता. देशांतल्या सुमार 30 कोटी वापरप्यांक हाचो थेट फायदो जावंक शकता. सीएनबीसीन सूत्रांचो उल्लेख करून ही म्हायती दिल्या.
जुलयांत जियो, एअरटेल आनी वोडाफोन आयडिया (VI) कंपनीन रिचार्ज प्लॅनाचे दर 25 टक्क्यां मेरेन वाडयले. हाचो थेट परिणाम फकत फोन करपा खातीर फोन वापरपी गिरायकांचेर जालो. भारतीय दूरसंचार नियामक प्राधिकरणान (TRAI) स्पॅम कॉल आनी संदेश आडावपाक अपेस आयिल्ल्या रिलायन्स जियो, भारती एअरटेल, वोडाफोन आयडिया (VI) आनी बीएसएनएल कंपनींक 12 कोटी रुपया दंड घाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
