भांगरभूंय | प्रतिनिधी
राष्ट्रीय गिरायक अधिकार दीस कार्यावळींत उक्तायलें मत
पणजी: गिरायकांक तांच्या अधिकारांची जाण करून दिवपा खातीर गिरायक चळवळ तळागाळांत पावूंक जाय अशें मत नागरी पुरवण खात्याचे सचीव संजीत रॉड्रिग्ज हांणी उक्तायलें. सोमारा खात्या वतीन राष्ट्रीय गिरायक अधिकार दिसा निमतान आयोजीत कार्यावळींत ते उलयताले. कार्यावळीत खात्याचे संचालक जयंत तारी, बेला नायक, राहूल सुदन आनी हेर अधिकारी हाजीर आशिल्ले. ह्या वेळार राज्य गिरायक हेल्पलायन आनी ईमेलीचें अनावरण केलें.
रॉड्रिग्ज हांणी मुखार म्हणलें, गिरायकांची फटवणूक जाले उपरांत ते हे विशींची कागाळ करिनात. कारण खूबशे फावटी तांकां आपले हक्क खबरूच आसनात. अशे स्थितींत तांचे मेरेन राज्य आनी जिल्हो पांवड्यार गिरायक कागाळ निवारण आयोगाचे काम पावोवप गरजेचें आसा. आयोगा कडेन कागाळ करीत जाल्यार आपल्याक न्याय मेळूंक शकता असो विस्वास गिरायकां मदीं येवप गरजेचें आसा. गिरायक चळवळींत तरणाट्यांक आस्पाव घेतल्यार ही चळवळ मुखार वचूंक शकतली अशेंय तांणी म्हणलें.
जयंत तरी हांणी सांगलें की, फाटल्या कांय वर्सांत आयोग तंत्रज्ञानाचो वापर करून गिरायकांक चडांत चड मजत करपाचो यत्न करीत आसा. ते प्रमाण आमी हालींच गिरायक हेल्पलायन सुरू केल्या. तशेंच ई दाखील ह्या पोर्टला वरवीं वा ईमेली वरवीं ऑनलायन कागाळ स्विकारप सुरू केलां. जाल्यार सुनावणेक कचेरेंत येवंक शकनाशिल्ल्या ज्येश्ठ नागरिकां खातीर व्हिडियो कॉन्फरन्स सेवा सुरू केल्या.
मडगांवां कन्सेलिएशन सेवा सुरू करतले
गिरायक कागाळी जाता तितल्यो बेगीन सुटोव्यो करपा खातीर समेट समितीची स्थापणूक केल्या. ही सेवा सद्या पणजेंत सुरू आसा. अशी सेवा मडगांवांय सुरू करपाचो आमचो विचार आसा अशें जयंत तारी हांणी सांगलें.
301 प्रकरणां निकालांत, 333 प्रलंबीत
मेळिल्ले म्हायती प्रमाण राज्य आनी जिल्हो पांवड्यार गिरायक कागाळ निवारण आयोगा कडेन 2023-24 वर्सा वट्ट 634 कागाळी आयिल्ल्यो. हातूंतलीं 301 प्रकरणां निकालांत काडल्यांत. जाल्यार 333 प्रलंबीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
