भांगरभूंय | प्रतिनिधी
शांती, समाधानाच्या मार्गार चलात, असो जेजूचो संदेश. तो थोडो तरी आमी स्विकारलो जाल्यार ताचे विशींची श्रद्धा फळाक येतली.
जशे हिंदू धर्मांत सण, परबो मनयतात, तशेच कॅथलीक भाव प्रभू येशूचो जल्मदीस व्हड खोशेन मनयतात. डिसेंबर लागीं पावता तशी तांकां सगल्यांक नातलांची उमळशीक लागता. 25 डिसेंबर हो येशूचो जल्मदीस. घर रंगोवप, केक, दिवाळेक आमी करतात तसचो फराळ म्हणल्यार नेवऱ्यो, लाडू, शंकरपाळी, दोदोल करतात. नातलांचे केक, नखेत्रां, नवे कपडे, सजावटीचे सामान हाडपाक माॅलांनी, बाजारांत गर्दी जाता.
प्रभू येशुचो जल्म बेथलेहेम गांवांत एका गोठ्यांत जालो. नातलांच्या सणाक ताच्या जल्माचो देखावो करतात. हें नातलांचें खाशेलेंपण. आपल्या घरा भायर सुंदर, आकर्शक गोठो तयार करतात. तातूंत तण, माडाची चुडटां, रंगीत कागद, फोली, हिरवळ हाचेर तो गोठो बांदतात. तातूंत जेजूच्या जल्मदिसाचो देखाव करतात. जेजूची माय मेरी आनी तिच्या ओंजळींत धाकटुलें बाळक म्हणल्यार येशू. शेजरा तांचे बापूय जोसफ, कोनशाक बशिल्लीं मेंढरां, मेंढपाळ पळोवपाक मेळटात. बोमाडे, रंगीत बल्बांचे रोशणायेन गोठा सामको लखलखून वता. तातूंत मंद उजवाड पातळिल्लो आसता.
गोठ्यांत साबार तरेचे देखाव आसतात. व्हडले दोंगर, न्हंय, दर्या, निळेंच मळब, तातूंत चकचकपी नखेत्रां असो रमणीय देखावो नदरेक पडटा. जेजूच्या माथ्यार चमकपी व्हडलो तारो, कितलो सुंदर दिसता. बाळक येशूचें सोबीत मुखामळ, खीणभर संवसाराक विसरूंक लावपी ताचें तें रुप पळोवन दोळे दिपून वतात. सगले जाण ख्रिस्मस झाडा भोंवतणी फेर धरून पदां म्हणटात.
गोठ्या वांगडा नातलांचें खाशेलपण म्हणल्यार सांता क्लाॅज. हातांत बडी, लांब झग्याक कापसा सारकी धविफुल्ल किनार लायिल्ली तोपी, तांबडोच भेस. पायांत गमबूटा सारके व्हडले बूट… हातांतली बडी, घांट वाजयत तो खाड खाड आवाज करीत दोळे मिचकायत येता. माणकुल्या भुरग्यांक तो चाॅकलेटी, खेळणी गिफ्ट दिता.
येशू क्रिस्ता सारक्या व्हडल्या मनशाचो जल्म साद्या गोठ्यांत जालो. तो गरिबांचो कैवारी. ताका गरिब, दुबळ्यां विशी कळकळ, तळमळ, आपुलकी आशिल्ली. गरिबांचो रक्षणकर्तो म्हूण ताका वळखतात. खरेंच हो नाताल सण म्हणल्यार उमेद, जोश, खोस वाडोवपी सण. मजा करपाचो हो दीस. शांती, समाधानाच्या मार्गार चलात, असो जेजूचो संदेश. तो थोडो तरी आमी स्विकारलो जाल्यार ताचे विशींची श्रद्धा फळाक येतली. सगल्यांक नातलांचीं परबीं. नातलां आनी नवें वर्स सुख, समाधानाचें वचूं.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
