भांगरभूंय | प्रतिनिधी
कोचीः कोंकणी केंद्र गोश्रीपूर, कोंकणी भाशा प्रचार सभा आनी सुशिला त्रिविक्रम भट परिवार हांच्या जोडपालवान स. सुशिला त्रिविक्रम भट यादस्तीक पुरस्कार 22 डिसेंबराक भेटयले. हो सुवाळो चेरळायी, कोच्चीच्या कोंकणी भाशा भवनांत जालो.
सुवाळ्याक दनपारां 3.30 वरांचेर क्रोधी मार्गशीर्ष कोंकणी कवी संमेलनान सुरवात जाली. गोश्रीपुरम हरिकुमार, एस. रामकृष्ण किणी, वसंतकुमारी पी.एस., जया बालकृष्ण कामत, नारायण नायक, धन्या जी. मल्या, अनिता डी. किणी, सुरेश वी. शेणै, आर. रामानंद प्रभु, अंडिक्कडवु सुरेश पै, गोविंद एस. नायक, सुधीश एस. शेणै, आर. राजेंद्र भट, के. एन. आर. भट, विजयकुमार एन. पै, आर. एस. भास्कर, एन. बालकृष्ण मल्या, एन. सदानंद कम्मत सयत 18 कवींनी ह्या संमेलनांत कविता सादर केल्यो.
सांजेच्या 5 वरांचेर अंजली भट हांणी ईशस्तवनान पुरस्कार वितरण सुवाळ्याक सुरवात जाली. निवृत्त अध्यापिका, स्तंभ लेखिका आनी भाषांतर विशेशज्ञा डॉ. प्रतिमा आषर हांणी दिवली पेटोवन सुवाळ्याचें उक्तावण केलें. आपली लिपी वा व्याकरण ना, अशी लोक फकाणां करताले. तो आदलो काळ बदल्ला आनी आयज कोंकणी आपलीच अस्मिताय समजून घेवन उंच सुवातेर पावल्या, अशें तांणी सांगलें.
नामनेचे संगितकार आनी केनरा रोबेको, मंगलापुरम वाठाराचे आंचलीक मुखेली मुरलीधर जी. शेणै मुखेल सोयरे म्हूण तशेंच कोंकणी भाषा प्रचार सभाचे अध्यक्ष आनी निवृत्त न्यायाधीश एस. मनोहर किणी अध्यक्ष पदार आशिल्ले.
विलासिनी नारायण नायक हांकां साहित्यकृती पुरस्कार, एल. कृष्ण भट हांकां सेवा पुरस्कार, के. एन. आर भट हांकां कथा रचना पुरस्कार, एस. रामकृष्ण किणी हांकां कविता रचना पुरस्कार आनी आर. सदानन्दन आनी एस. माया पी. हांचो सेवा पुरस्कार दिवन भोवमान केलो.
कोंकणी भाशा प्रचारसभाचे संयुक्त सचीव सुरेश पी. पै हांणी उपकार मानले. ह्या सुवाळ्या उपरांत टी.डी.एल.पी. शाळेची कोंकणी शिक्षिका सरस्वती. एस. प्रभु हांच्या मार्गदर्शना खाला भुरग्यांनी रंगरंगयाळी नाचाची कार्यावळ सादर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
