भांगरभूंय | प्रतिनिधी
मडगांव : जमीन हडप प्रकरणांतलो गुन्यांवकार सुलेमान सिद्दीकी हाका दोन दिसां पयलींच केरळांत अटक केल्या. ताका आयज गोंयांत हाडटले. ताची चवकशी केले उपरांत ताचे वांगडा कोण आसात, हाचे वांगडा जायत्यो गजाली मुखार येतल्यो. विरोधकांनी ह्या प्रकरणाचो चुकीचो वापर केलो. एकल्याय गुन्यांवकाराक सोडचे ना, अशें मुख्यमंत्री डॉ. प्रमोद सावंत हांणी सांगलें.
मडगांवां कार्यावळी आयिल्ले मुख्यमंत्री डॉ. सावंत हांणी लोकांक लुटपी एकाय गुन्यांवकाराक सोडचे नात. गोंयकारांक भियेवपाची गरज ना, असो विस्वास दिलो. तांणी लोकांक पुलिसांचेर आनी राज्य सरकाराचेर विस्वास दवरपाचो उलो मारलो.
सुलेमान सिद्दीकी आपलो सोयरो आशिल्ले वरीं, तांच्या पक्षांत प्रवेश करतलो असो, ताचो फोटो घेवन भोंवप्यांक आतां पुलिसांची तांक कळून येतली. सुलेमान सिद्दीकीचेर राज्य सरकारान गुन्यांव नोंद केल्यात. सुलेमानान पुणे, दिल्ली आनी देशांतल्या हेर सुवातांचेरूय घोटाळे केल्यात. गोंय पुलिसांनी सुलेमानाक परत केरळांत दोन दिसां आदीं अटक केल्या. पुलिसांची कागदोपत्री प्रक्रिया उरिल्ल्यान ताका अटक जाल्ल्याची म्हायती दिवंक नाशिल्ली. ती पुराय केले उपरांत गोंय पुलिसांनी ताका अटक केली.
सरकारा आड जे कोण उलयल्यात, ते सगळे ताची चवकशी केले उपरांत उक्ते जातले. लोकांक सुलेमान सिद्दीकी हाचे वांगडा कोणकोण आसात, हें कळून येतलें. कांय जाण सुलेमानाक सोडचे खातीरूच फोटो घेवन भोंवतात. सुलेमानाचो एक व्हिडियोय व्हायरल जाल्ल्याचें समजलां. तांतल्यान विरोधी पक्ष सिद्दीकीचो कसो चुकीचो वापर करतालें तें दिसून आयलां. गोंयकारांनी भियेवपाची गरज ना. लुटपी, जमनी हडप करप्यांक राज्य सरकार केन्नाच सोडचें ना, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
