भांगरभूंय | प्रतिनिधी
अटंग्या रानां वाठारांतल्या गांवांत एक जाण्टी बायल आपले नाती वांगडा खोपींत रावताली. एक दीस त्याच गांवांत चार डाकू लुटमार करपाक आयिल्ले, तेन्ना लुटमार करता करता सांज जाली आनी गडगड वादळी वाऱ्या सयत उटंगाराचो पावस रकपाक लागलो. तशे चारूय डाकू काचाबूल जावन हेवटेन -तेवटेनआलाशिरो सोदपाक लागले. अचकीत तांकां जाण्टे बायलेची खोप दिसली तशे ते खोंपी कडेन गेले आनी आलाशिऱ्या खातीर जाण्टे बायले लागीं विनवणी करूंक लागले. काकुळटेन तिणें डाकवांक एके राती खातीर आलाशिरो दिवपाचो हयकार दिलो. ते रातीं जाण्टे बायलेन तांचे खातीर सुरबूस जेवण रांदलें. जेवपाच्या वेळार पुण्य आनी पातक हो विशय आयलो. सगळे आपले पद्दतीन विचार परगटायताले. तांचे विचार आयकून निमाणें जाण्टे बायलेन तांचे कडेन पैज मारपाचो प्रस्ताव मांडलो. ताणीय मांडिल्ल्या प्रस्तावाक तेंको दिलो.
जाण्टे बायलेन तांकां पैज सांगली “भायर वीज पडटा. हांव, म्हजी नात आनी तुमी चारूय जाणांनी भायर मुकावयल्या चिचे रुखाक हात लावन परत खोंपींत येवचें, जाचेर विज पडटली तो पापी आनी बरें भशेन परतून येवपी पुण्यवान थारतलो .” पयलीं पयलो डाकू चिचे रुखाक हात लावन सुरक्षीत परत खोपींत आयलो. दुसरो गेलो, तिसरो गेलो, चवथो गेलो कोणाचेरूय विज कोसळूंक ना. आतां जाण्टे बायलेची आनी नातीची पाळी आयली, हे चारुय डाकू सद्गुणी थारले, आमी पापी आसूंक जाय, आमचेर वीज पडटली असो विचार करत नातीक हांडयेर घेवन खोंपींतल्यान भायर सरता थंय आसा, त्याच खिणाक खोंपीचेर वीज पडली आनी एका खिणा भितर तातूंत आशिल्ले चार डाकू लासून मेले.
बोध
——
आयज लेगीत एका सद्गुणी मनशाच्या सवकळींत रावल्यार बरें मार्गार पावंक शकतात आनी तागेली संगत सोडली जाल्यार, त्या चार डाकवां भशेन जिविताचो गोबोर जावंक शकता. म्हणून सदांच पुण्याचो वांटो घेवचो.
—————————–
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
