भांगरभूंय | प्रतिनिधी
पोरूं एकलोय वचूंक ना; हेर दुयेंसांचेर 4,640 दुयेंतींनी घेतले उपचार
भांगरभूंय । प्रतिनिधी
पणजीः गोंयांतल्या एकाय कांक्र पिडितान पोरूं आयुष हॉस्पिटलांत उपचार घेवंक नात. हेर दुयेंसाची लागण जाल्ल्या 4,640 जाणांनी आयुष हॉस्पिटलांत वचून उपचार घेतले, अशें केंद्रीय आयुषमंत्री प्रतापराव जाधव हांणी लोकसभेंत लेखी प्रस्नाक दिल्ले जापेंत ही म्हायती मेळ्ळ्या.
कांक्रा पासून मुक्ती मेळोवचे खातीर कांय राज्यांतले दुयेंती आयुर्वेदा कडेन वळटात. ते खातीर तांणी आयुष हॉस्पिटलांत वचून उपचार घेतात. पोरूं वर्सभरांत राजस्थान, दिल्ली, हरयाणा, कोलकाता, मेघालय, तामीळनाडू, केरळ, कर्नाटक, आंध्रप्रदेश, पुदुच्चेरी ह्या राज्यांतल्या 14,255 कांक्र बाधितांनी आयुष हॉस्पिटलांत वचून दुयेंसाचेर उपचार घेतले. पूण गोंयांत मात एकाय दुयेंतीन आयुष हॉस्पिटलांतल्या उपचाराक प्राधान्य दिवंक ना, अशें मंत्री जाधव हांणी जापेंतल्यान सादर केल्ले आंकडेवारींतल्यान दिसून येता. मजगतीं, पोरूं वर्सभरांत गोंया सयत 30 राज्यांतले विवीध दुयेंसांनी पिडीत आशिल्ल्या 16,21,178 जाणांनी आयुष हॉस्पिटलांत वचून उपचार घेतल्यात. तातूंत गोंयांतले 4.640 जाणांचो आस्पाव आसा. तातूंतले 3,582 जाणांनी आयुर्वेद, 360 जाणांनी होमियोपॅथी, जाल्यार 698 जाणांनी सिद्धाचे उपचार घेतल्यात, अशें मंत्री जाधव हांणी दिल्ले जापेंतल्यान स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
