भांगरभूंय | प्रतिनिधी
बंगळुरू, खबरां संस्था: देशभरांत सदांच अपघाताच्यो घडणुको घडतूच आसात. आतां बंगळुरुच्या नेलमंगळा म्हालांतल्या बंगळुरु राष्ट्रीय म्हामार्गार भिरांकूळ अपघात जाल्ल्याची घडणूक घडल्या. हो अपघात शेनवारा रातीं सुमार ११ वरांचेर जालो. ह्या अपघातांत एकाच कुटुंबांतल्या ६ जाणांक मरण आयलें. मरण आयिल्लें कुटुंब हें सांगलीच्या जत म्हालांतल्या मोरबगी गांवचें आशिल्लें.
हे विशीं चड म्हायती प्रमाण, हें कुटूंब ख्रिसमसाच्या सुटये निमतान बंगळुरूच्यान जतकडे आपल्या गांवांत वतालें. मात गांवांत वतना एक कंटेनर तांचे चार चाकी गाडयेर अचकीत लवंडलो आनी एका आयटी इंजिनिअरा सयत ६ जाणांक मरण आयलें. हातूंत चंद्रम इप्पाळगोळ, ताची बायल पत्नी गौराबाई (४० ), तांचीं भुरगीं ज्ञान (१६) आनी दीक्षा (१०), तांची मेवणी विजयालक्ष्मी (३५) आनी तांची भाची आर्या (६) अशीं मरण आयिल्ल्यांचीं नांवां आसात.
चंद्रम इप्पाळगोळ हे बंगळुरा एके सॉफ्टवेअर कंपनींत सीईओ आशिल्ले. तांचें कुटुंबूय तांचें वांगडा बंगळुरू रावतालें.
बंगळुरू पुलिसांनी दिल्ले म्हायती प्रमाण, चंद्रम इप्पाळगोळ आनी तांचें कुटूंच कर्नाटकच्या विजयपुरा जिल्ह्याच्या शीमेक तेंकून आशिल्ल्या मोरबागी हांगच्या तांच्या गांवांत वताले. ते तांच्या दुयेंत आशिल्ल्या बापायक मेळपाक आनी ख्रिसमस सुटये निमतान वताले. मात, अचकीत एक वेगान येवप कंटेनर ट्रक तांचे गाडयेर उमथलो आनी त्या पुराय कुटुंबाक मरण आयलें. दोन म्हयन्यां पयलींच चंद्रम इप्पाळगोळ हांणी नवी गाडी घेतिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
