भांगरभूंय | प्रतिनिधी
पेडणे : हंसापूर- चांदेल पंचायत वाठारांतल्या हिंदूंच्या खंयच्याच धर्मीक उत्सवांत मुस्लीम वेपाऱ्यांक आपली दुकानां घालपाक मेळचीं ना. आयज 22 डिसेंबराक सांतेरी ब्राह्मण देवळाची जात्रा आसा. म्हाजन आनी देवळाचे समितीन मुस्लिमांक हे जात्रेंत दुकानां घालपाक बंदी घाल्या. हे जात्रे पयलीं कांय जाणांनी हिंदूंक जागृत करपी फलक सगले कडेन लायले. तातूंत मुस्लीम जिहाद्यांना बंदी, थूक जिहाद, लव जिहाद, वक्फ बोर्ड, जमीन जिहाद, वोट जिहादा पासून सावध रहा, खरेदी फक्त हिंदूकडूनच करा, All eyes on Bangladeshi hindus अशे फलक लायिल्ले दिसतात.
ह्या देवस्थानाच्या म्हाजनांची बसका जाली, तातूंत मुस्लिमांक दुकान घालूंक दिवपाचें ना, असो निर्णय घेतला अशें देवस्थान समितीचे अध्यक्ष संतोष मळीक हांणी सांगलें. देशभरांत हिंदूंचो एक उपक्रम चालू आसा. ताका आमी तेंको दिता आनी तेप्रमाण हो निर्णय घेतला, अशेंय तांणी सांगलें.
तांणी सांगलें, आयज जात्रा जाता. सकाळीं एक मुस्लीम आपलो स्टाॅल घालपाची तयारी करतालो. देवस्थान समितीच्या हे लक्षांत आयलें. तांणी बेगीन थंय वचून ताका स्टाॅल काडपाक सांगलो. आयजूच न्हय, तर हाचे मुखारुय गांवांत हिंदूंचे सण, उत्सव, जात्रा आसतात, तेन्ना मुस्लिम समाजाचे एकेय व्यक्तीक दुकान, स्टाॅल घालपाक दिवचे नात, अशें मळीक हांणी सांगलें.
फातर्पेंच्या जात्रेत असो निर्णय घेतला. तांच्या पावलार पावल दवरून आमी हो निर्णय घेतला. हाचे मुखार आमी कायम तो पाळटले, अशेंय एका म्हाजनान सांगलें.
हाचे मुखार ह्या देवस्थानाचे खंयचेच कार्यावळीक, जात्रेक, वर्धापनदिसाक मुस्लिमांक दुकानां घालूंक दिवचे नात. गोंयच्या सगल्या देवस्थानांनी हेच तरेचो निर्णय घेवचो, अशें म्हाजन डाॅ. भिवा लाडू मळीक हांणी पत्रकारां कडेन उलयतना सांगलें. हे बसकेक म्हाजन आनी विश्व हिंदू परिशदेचे सुहास मळीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
