भांगरभूंय | प्रतिनिधी
गरजेक अक्कल ना…..! अशें म्हण्टात आनी तें खरेंय आसा. गरज ही अशी एक गजाल जी दुसऱ्या मुखार मान सकयल घालपाक लायता. आनी गरज सदांच पयशांचीच आसता अशें गृहीत धरचें न्हय. भोवतेक वेळार मानसीक आदाराचीय गरज आसता. सुलूस दिनासतना जिवीतांत त्रास, आडमेळीं, संकश्टां खंयचें खिणांत येवन परिक्षा घेयत हाचो अदमास लावप खूप कुस्तार. जायते फावटीं कुटुंबांतलो एकाद्रो मनीस अर्थीक संकश्टांत सापडटा आनी कांय प्रमाणात लागपी दुडवां खातीर तागेलें काम आडखळटा.
जेन्ना उधार पयशां खातीर कोणा कडेन उतर घालता तेन्ना कितलें आनी कितें आयकुवचें पडटा तें अणभवाक येता. लागींचो मनीस आशिल्यान प्रत्यक्षांत उपदेशा परस मजतीची अपेक्षा आसता. अशे वेळार लागीच्या सोयऱ्या धायऱ्यांच्या मूळ सभावाची पुरायपणान जाणविकाय आसून लेगीत आडमेळीं येतात. त्या वगतार तो कसो वागतलो हाचो थाव घेवप सामकें कठीण.
एक सादें उदारण घेवया, मुदलांत मनीस जात ही आशावादी आसा आनी जिणेंत सामकार कसली तरी मोख दवरून ती जियेता. दरेकल्या मनशाचें आपलें सोबीत घर आसचें हें सपन मनांत बाळगिल्लें आसता. तें प्रत्यक्षांत साकार जावूंक ना जाल्यार तो गुन्यांवकारी थारना, पूण आर्विल्ले काळांत घर घेवप सोपी गजाल न्हय. तरूय घराचें सपन पुराय करपाक मनीस रात -दीस एकठावन भोव कश्ट करता. निमाणो सहनशिलतेचो अंत जाता तो रीण घेतना. कारण, सगलीं सवंगां करपाक मेळटात पूण पयशाचें सवंग करपाक मेळना, अश्या वगतार देखून जेन्ना सगले कडसून न्हयकार येता. तेन्ना आतां सगलें पळयिल्लें सपन सपनूच उरलें म्हणत निर्शेवन व्हडली चूक करतात. कारण, सगळें सोंपलें अशें दिसता तेन्ना मुखार एक तरी आशेचो किरण दिसता आनी तें किरण म्हणल्यार सकारात्मक विचार करपाची पद्धत.
डोळ्यांक मुखारची वाट दिसना जाल्यार फुडें वाट ना असो सर्वसामान्यांचो समज आसता. पूण ती चूक वाटेची नासता जाल्यार नदरेची आसता. मनीस वयल्यान कितलोय बळिश्ट आसलो तरी ताचे हात खंय तरी आडकतातूच. सपन पळोवपाचो अधिकार दरेकल्याक आसा, पूण तें पुराय करतना जाय आशिल्ल्यो गजाली पुराय जायनात जाल्यार मागीर मनांत विचार येता, कितलें आनी खंयचे दिकेन धांवचें? कितलोय कठीण काळ आसलो आनी परिस्थिती आवड सारकी नासली वा हातां भायर गेल्यार लेगीत हार मानूंक जायना. कारण काळ केन्नाच तसोच उरना. वैशाखाचे खर उश्णतायेचो त्रास सोंसतात, पूण उपरांत पयल्या पावसाचे दडकेन तापिल्ली भूंय शितळ जाता तेन्ना बरें दिसता. फातेंपार ते सांजवेळाच्या झिळमिळते उजवाडांत लेगीत जो ताज्जो टवटवीत उरता तो दीस जिखता.
सुदिन वि. कुर्डीकार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
