कुपोशणाचेर नियंत्रण दवरपांत गोंय देशांत पयलें

भांगरभूंय | प्रतिनिधी

भांगरभूंय । प्रतिनिधी
पणजीः भारतांत कुपोशणाचेर नियंत्रण दवरपाचे बाबतींत गोंय पयल्या क्रमांकाचेर आसा. फाटल्या पांच वर्सांत राज्यांत कुपोशीत भुरग्यांचो दर 4.10 टक्के आसा. पूण कुपोशणाक लागून भुरग्यांक येवपी मरणाचेर नियंत्रण दवरपा बाबतीत गोंय तिसरें सुवातेर आसा, अशीं म्हायती केंद्रीय बायलां आनी भुरगी उदरगत मंत्रालयान दिल्या.
राज्यसभेंत लेखी उत्तरांत केंद्रीय बायलां आनी भुरगी कल्याण मंत्री अन्नपुर्णा देवी हांणी सांगलें की, गोंयांत भुरगीं कुपोशीत जावपाचो दर हेर राज्यांचे तुळेंत कमी आसा. फाटल्या पांच वर्सांत म्हणल्यार ऑक्टोबर 2024 मेरेन 4.1 टक्के कुपोशण नियंत्रण दरा सयत गोंयांन पयलें सुवातेर आपली सुवात कायम राखल्या. जाल्यार 7.7 टक्के कुपोशण दरा सयत मणीपुर हे राज्य दुसरें सुवातेर जाल्यार 9.2 टक्के सिक्कीम हे राज्य तिसरें सुवातेर आसा.
कुपोषण दर कमी आसून नियंत्रणा बाबत पयलें सुवातेर आसून लेगीत कुपोशणाक लागून मरणांचेर नियंत्रण दवरपा बाबतीत गोंय दुसऱ्या क्रमांकाचेर आसा. कुपोशीत भुरग्यांच्या मरणाच्या नियंत्रणाचो राज्यांचो दर 0.6 टक्के आसा. जाल्यार पयल्या क्रमांकाचेर 0.3 टक्के दराचेर मणीपुर राज्य आसा. जाल्यार 0.4 टक्के दरां सयत मेघालय राज्य दुसरें आसा.
सगळ्यांत कमी उण्या वजनाची भुरग्यांचे संख्ये बाबतीत गोंय देशात पयलें आसा. राज्यांत उणी वजनाची भुरगी संख्या दर 1.7 टक्के आसा. गोंया बरोबर 1.7 टक्के दर सयत सिक्कीम ही दोनूय राज्या पयलीं आसा.
कुपोशणाचे आव्हान पेलपां खातीर 15 वे वित्त आयोगाच्या आंगणवाडी सेवा, पोशण अभियान आनी किशोरवयीन चलया खातीर येवजणे हे घटकां भितर सक्षम आंगणवाडी आनी मिशन पोशण 2.0 हे येवजणांचो आस्पाव आसा. ह्यो दोनूय केंद्रीय येवजण्यो आसात आनी ह्या येवजण्यांची अंमलबजावणी दिसभरांतले उपक्रम राबोवप ही राज्यांची जापसालदारकी जावन आसा.
मनीस भांडवलाचे उदरगती खातीर योगदान दिवप, कुपोशणाचे आव्हानांक तोंड दिवप, पोशणाची जागृताय आनी शाश्वत भलायकी आनी कल्याणा खातीर दर्जेदार अन्नांक उर्बा दिवप हो येवजणेचो हेत जावन आसा.