भांगरभूंय | प्रतिनिधी
खबरां संस्था ः सद्याच्या काळांत प्लास्टीक हो आमच्या दिसपट्ट्या जिणेचो एक भाग जालां. पूण एक संशोधनांतल्यान धक्को दिवपी गजाल उजवाडाक आयलां. एक मनीस ताच्या आहारांतल्यान वर्साक उण्यांत उणें ५.२ ग्राम आनी चडांत चड २६० ग्राम मायक्रोप्लास्टीक खाता. ऑस्ट्रेलियांतल्या न्यूकॅसल युनिव्हर्सिटीचे प्राध्यापक धावा पलानीसामी हांणी ही म्हायती दिल्या.
मायक्रोप्लास्टिक्स म्हळ्यार खूब ल्हान प्लास्टीकाचे कण. जे अन्न आनी स्वासांतल्यान आमच्या कुडींत भितर सरतात. हे धोक्याचे कण नळाचें उदक, बाटलीबंद उदक, म्होंव, मीठ आनी बियरांत लेगीत मेळटात. सी फूडांत ही समस्या चड गंभीर आसता. दर्यांतलो प्लास्टीक कोयर दर्यांतल्या जनावरांतल्यान मनशामेरेन पावता. ते भायर हवेंतल्यान येवपी मायक्रोप्लास्टिक्स श्वासांतल्यान कुडींत भितर सरतात.
दुयेंसांचो धोको वाडटा…
एम्साची प्राध्यापिका डॉ. रीमा दादा हांच्या मतान, मायक्रोप्लास्टीक आमची रोगप्रतिकार शक्त दुबळी करता. देखून गोडेंमूत, थायरॉयड, मज्जासंस्थेचे विकार, कॅन्सर ह्या गंभीर दुयेंसांचो धोको वाडटा. ताका लागून वांझपणूय जावं येता.
चडशे उदकांत…
प्राध्यापक धावा हांच्या अभ्यासा प्रमाण चडशे मायक्रोप्लास्टीक नळाच्या उदकांत आनी बाटलीबंद उदकांत मेळ्ळे. बाटलीबंद उदकांत प्लास्टीक चड प्रमाणांत आसता. हाचेभायर मीठ, म्होंव, साकर सारकिल्ली खाणाय प्लास्टीकाक लागून दुशीत जातात.
कुडीच्या अवयवां सयत ऊतकांत प्लास्टीक जमता. ताचो परिणाम सेर्टोली पेशी, जेम्स पेशी आनी हेर पेशीचेर जाता. हाका लागून कुडीच्या जायत्या भागांक गंभीर जखम जावंक शकता. ताका लागून बायलांक वांझपण, दादल्यांक नपुंसकता, गोडेंमूत, मज्जासंस्थेचे विकार, थायरॉयड, कॅन्सर आनी हेर दुयेंसांचो धोको वाडटा.
हुंदरांचेर केलें संशोधन…
हुंदरांचेर केल्ल्या संशोधनातल्यान अशें दिसून आयलां कि, तांकां चड प्लास्टीक खावपाक दिल्यार तांच्या अंडाशयांक लुकसाण जाता. अंडाशयाची राखण करपी पेशींचेरूय ताचो परिणाम जालो. ताका लागून अंडाशयाचो सांठो उणो जालो. हाका लागून पॉलीसिस्टीक ओव्हरी सिंड्रोम (पीसीओएस), वांझपण जावंक शकता. प्लास्टीकांत जायतीं रसायनां आसतात अशें संशोधनांतल्यान दिसून आयलां. हाचो परिणाम अंत: स्रावी तंत्राचेर जाता. तशेंच कुडीच्या जायत्या भागांचेर ताचो वायट परिणाम जाता. आनी ताका लागून रोगप्रतिकार शक्त दुबळी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
