भांगरभूंय | प्रतिनिधी
दरेकल्याच्या आयुश्यांत एक अशें नातें आसताच, जाचे पसून आमकां पयस रावप शक्यूच नासता. देखीक भुरग्यांचें आवय कडेन आशिल्लें नातें. म्हजें म्हजे आवय कडेन अशेच घट्ट नातें आसा. म्हजी मम्मा म्हणल्यार म्हजो आदार आनी मोग. मम्मा म्हाका लागून खूब त्रास काडटा. ती एकटी घर आनी घरच्यांकूय सांबाळटा. म्हज्या मम्माक हांव शिकून व्हड जाल्लें जाय. ताकाच लागून ती अभ्यास कर म्हूण फाटल्यान लागता.
म्हजी मम्मा कलाकुशळ. तिचें नांव सोनाली निलेश नायक गुरव. लग्नाची शिवण, मायक्रोनाचें तोरण, मळबदिवे, झुंबर, व्हूलाचें तोरण, मेजार घालतात तें टेबलमेट आदीं वस्तू तयार करपाची कला तिचे कडेन आसा. कपडें शिवपाचेंय काम ती करता. खासा करून म्हजे खातीर तीं स्वता कपडे शिवता. रांदपांतूय ती हुशार आसा. आमकां ती शेवपुरी, पाणीपुरी, सामोसा, फ्रायड रायस्, कटलेट करून खावपाक घालता. ती म्हणटा भायलें तेलकट आनी माल खाण खावचे परस घरचें खाल्लेलें बरें. म्हच्या वाडदिसाक ती केक घराच करता. तिच्या हातचो चॉकलेट केक खूब रूचीक लागता.
म्हज्या आनी तिच्या वाडदिसां मदीं एका दिसाचो फरक. पूण ती आपलो वाडदीस तसो स्वता केन्नाच मनोवपाक फुडें सरना. परोपकारी सभावाची म्हजी आवय आमकां सगल्यांक खुश दवरपाक खूब कितें करता.
तिका झाडां -रूखांचीय सामकी काळजी. घरां दारांत तिणें तरेकवार झाडां लायल्यात. ती तांची खूब जतनाय घेता. झाडाक मात कोणी हात लायिल्लो तिका चलना. फुलां काडटना पसून तांकां मोगान हात घालपाक जाय. जशीं मनशां तशींच झाडां. तांकांय जीव आसता, तांकांय दुखता. पूण तीं सोशीक आसतात, म्हजेच आवय भशेन. म्हूण ती कोणाक एक खांदी पसून काडून दिवची आसल्यार सामकी जतनायेन काडटा. देखून हांव म्हण्टा म्हजे मम्मा भितर वनस्पती रूजोवपाचीय एक कला आसा. आमगेर जाल्ली तरेकवार झाडां म्हणल्यार ब्रह्मकमळ, मोगरी, गुलाब, जायो, जुयो, दसण, दाट पाकळ्यांचो अनंत, गोकर्ण, हळडुळी कणेरां, पयशा झाड (मनी प्लांट), धुतरो, लिली, कोडूलिंब, सीताफळ, चिकू, खांवचीं पानां आदीं. हो रूखावळींचो संवसार म्हजा मम्मान स्वता तयार केला.
म्हजी मम्मा, भांगराळी आवय खरेंच भांगर कशी. आमकां सगल्यांकूच तीं सदांच आमचे वांगडा जाय. तिच्या कडल्यान म्हाका तिचे कडेन आशिल्ल्यो कला शिकून घेवंक जाय. तिचें नांव व्हड करूंक जाय. ती खुश आसल्यार आमीय खुश आसतात. आवय ही अशीच आसता, स्वयंपूर्ण आनी ममत्वान परिपूर्ण तशेंच मायेस्त आनी मोगाळ!
अवनी निलेश नायक गुरव
जी. के. नायक क्लासीस, प्रियोळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
