भांगरभूंय | प्रतिनिधी
फोंडें: पेटके -धारबांदोडेंच्या राष्ट्रीय म्हामार्गार मिनाची येरादारी करपी ट्रक आनी स्कुटरी मदीं अपघात जावन राहुल बन्सल (१९, हरियाणा) हाका मरण आयलें. जाल्यार शौनक प्रभाकर (१९, हरियाणा) हो पर्यटक गंभीर जखमी जालो. जखमीक फुडल्या उपचारा खातीर गोमेकॉंत व्हेला. अपघातांत सांपडिल्ले दोगूय तरनाटे दिल्ली टॅक्नोलॉजिकल युनिवर्सिटीचे विद्यार्थी आसात. स्कुटर पुरायेन काबार जाल्या.
मेळिल्ले म्हायती प्रमाण, युनिवर्सिटीचे ७ विद्यार्थी १८ डिसेंबराक वागातोर गेल्ले. शुक्रारा सकाळीं ४ मोटारी भाड्याक घेवन कुळेंच्या दूदसागर घसघश्याचेर वताले. हेर दोन दुचाकी घेवन. शौनक प्रभाकर हो जीए -०३-एजे- ४८४० नंबराची मोटार सायकल घेवन वेगान वतालो. पेटके हांगा विरुद्ध दिकेन येवपी जीए -०५- टी -२५१९ नंबराच्या ट्रकाक दुचाकीचो धपको बसलो. हातूंत दुचाकीवेले दोगूय जखमी जाले. जखमींक रोखडेच १०८ ऍम्बुलन्सींतल्यान पिळयें भलायकी केंद्रांत दाखल केले. मात भलायकी केंद्रांत पावचे पयलींच राहुल बन्सल हाका मरण आयलें. गंभीर जखमी जाल्ल्या शौनक प्रभाकर हाका चड उपचारा खातीर गोमेकॉंत व्हेलो. फोंडें पुलिसांनी अपघाताचो पंचनामो करून ट्रक चालक रामा वडार (सिद्धेश्वरनगर-उसगांव) हाका ताब्यांत घेतलो.
दिल्लीच्यान आयिल्ले ७ इश्ट दुचाकी घेवन कुळ्यां वतना फोंडें म्हालांत ४ इश्ट च्या पिवपाक रावले. वागातोर ते फोंडें मेरेन राहुल बन्सल दुचाकी चलयतालो. च्या घेतले उपरांत मुखार गेल्ल्या इश्टां मेरेन पावपा खातीर शौनक प्रभाकर हांणी दुचाकी आपणें चलोवपा खातीर घेतली.उपरांत अपघात घडून फाटल्यान बशिल्लो राहुल बन्सल हाका मरण आयलें. फोंडें पुलिसांनी अपघाताचो पंचनामो केलो.
मजगतीं, सुकतळी मोल्यां ई- पावणी केल्ल्या मिनाची येरादारी शुक्रारा सकाळ सावन सुरू जाली. मात पयल्याच दिसा जाल्ल्या अपघातांत एका विद्यार्थ्याक जीव होगडावचो पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
