भांगरभूंय | प्रतिनिधी
राज्यसभा खासदार सदानंद शेट तानावडे हांच्या प्रस्नाक पर्यटन मंत्रालयाची लेखी जाप
भांगरभूंय । प्रतिनिधी
पणजीः गोंयांत फाटल्या तीन वर्सांत देशी तशेंच विदेशी पर्यटकांचे संख्येंत खूब वाड दिसून आयला. विदेशी पर्यटकांचे तुळेंत देशी पर्यटकांचो आंकडो चड आसा. फाटल्या तीन वर्सांत देड कोटी परस चड देशी पर्यटकांनी गोंया भेट दिल्या जाल्यार गोंया भेट दिवपी विदेशी पर्यटकांचो आंकडो 6 लाख मेरेन आसा, अशी म्हायती केंद्रीय पर्यटन मंत्रालयान दिल्या.
राज्यसभा खासदार सदानंद शेट तानावडे हांच्या प्रस्नाक संसदेंत लेखी जाप दितना केंद्रीय पर्यटन मंत्री गजेंद्र सिंह शेखावत हांणी सांगलें, 2021 ते 2023 मेरेन गोंयांत 184 कोटी देशी पर्यटकांनी भेट दिली जाल्यार फक्त 6 लाख विदेशी पर्यटकांनी भेट दिली.
2021 त 33.08 लाख देशी पर्यटकांनी भेट दिल्ली. हो आंकडो 2022 त 70.12 लाख मेरेन पावलो आनी 2023 त ह्या आंकड्यांत वाड जावन तो 81.75 लाखांचेर पावलो. जाल्यार 2021 त फक्त 22 हजार विदेशी पर्यटक गोंयांत आयले. 2022 त हो आंकडो 1.75 लाख मेरेन पावलो आनी 2023 त ह्या आंकड्यांत मात्शी वाड जावन 4.53 लाख विदेशी पर्यटक गोंयांत पावले.
गोंयच्या शाश्वत पर्यटनाचो प्रचार पर्यटन मंत्रालय आपले वॅबसायट आनी सोशल मिडीया वरवीं करीत आसा. पर्यटनांत विविधताय हाडपा खातीर ‘देखो अपना देश’ ह्या सारकिल्ल्या उपक्रमा खाला पर्यटन मंत्रालय कोणाक खबर नाशिल्ल्या पर्यटन थळांची प्रसिध्दी करता. मंत्रालयान स्थापन केल्ल्या शाश्वत पर्यटना खातीरची राष्ट्रीय रणनीतींत पर्यटन शाश्वताय आनी सामाजीक-सांस्कृतीक शाश्वताय हे दोन मुखेल खांबे जावन आसात. हे रणनीती खाला ‘ट्रॅव्हल फॉर लायफ’ हो उपक्रम चालीक लावन शाश्वत पर्यटनाचो प्रचार करून पर्यटन वेवसायीक आनी पर्यटकांक शाश्वत पर्यटन पद्दतीत वांटेकार जावपाक उर्बा दिता.
पर्यटक आनी पर्यटन थळ हांकां केंद्रीत करून शाश्वत आनी जापसालदार पर्यटन थळांची उदरगत करपाच्या उद्देशान मंत्रालयान स्वदेश दर्शन येवजण ही सुदारीत करून स्वदेश दर्शन 2.0 ही नवी येवजण चालीक लायल्या. पर्यावरण शाश्वताय, सामाजीक- सांस्कृतीक शाश्वताय आनी अर्थीक शाश्वताय हांचो आस्पाव आशिल्लें शाश्वत पर्यटनाचे तत्व आत्मसात करपा खातीर ही येवजण उर्बा दिता. ते भायर ह्या अर्थीक वर्सांत तीन प्रकल्पां खातीर केंद्रीय पर्यटन मंत्रालयान 204 कोटी इतलो निधी मंजूर केला. 2024- 25 त मंत्रालयाचे प्रसाद येवजणे खाला पोरणे गोंयची बसॅलिका ऑफ बॉम जिझस हे इगर्जीची अध्यात्मीक पर्यटना खाला 16.46 कोटी रुपया खर्चून उदरगत जातली. तशेंच भांडवल गुंतवणुकी खातीर गोंयाक अर्थीक आदार म्हूण फोंडें छत्रपती शिवाजी महाराज संग्रहालया खातीर 97.46 कोटी आनी पर्वरे प्रस्तावीत टावनस्केअर खातीर 90.74 कोटी मंजूर केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
