पियेवपाच्या सुरक्षीत उदक पुरवणे खातीर केंद्राचो सोडून गोंयान मोडला स्वताचो निधी

भांगरभूंय | प्रतिनिधी

पणजीः केंद्रीय जल जिवन मिशना खाला कुटुंबांक पियेवपा खातीर सुरक्षीत उदक दिवपाक केंद्रांतल्यान 131 कोटी रुपयांचो निधी दिला. पूण केंद्राचो निधी मोडचे सोडून गोंय राज्यान आपल्या बोल्सांतलो निधी मोडप पसंत केलां. हे खातीर राज्य सरकारान आपल्या बोल्सांतले 69 कोटी खर्च केल्यात, जाल्यार 39 कोटी केंद्रांतलो निधी खर्च केला, अशी म्हायती केंद्रीय जल शक्ती मंत्रालयान दिल्या.

लोकसभेच्या पटलार लेखी जाप दितना केंद्रीय जल शक्ती राज्य मंत्री व्ही. सोमण्णा हांणी सांगलें, कुटुंबांक सुरक्षीत आनी पियेवपा सारक्या उदकाची पुरवण करपा सयत उदकाचो दर्जो तपासपा खातीर आनी ताचेर देखरेख दवरपा खातीर 2019- 20 ते 2024- 25 मजगतीं केंद्रांतल्यान गोंयाक 131 कोटी रुपया निधी मंजूर जाल्लो. तातूंतले 43.3 कोटी रुपया निधी राज्यान आपल्या खात्यांत घातला आनी 39.2 कोटी रुपया निधीचो वापर केला. जाल्यार हे खातीर गोंयचो वांटो म्हूण 69.03 कोटी रुपयांचो निधी सरकारान आपलो खर्च केला. केंद्रांतलो मंजूर केल्लो निधी सरकाराचे तिजोरेंत आसलो तो आतां वापरून फकत 4 लाख रुपया निधी सरकाराच्या खात्यांत उरला.

2019- 20 त केंद्रान 7.57 कोटी रुपयांचो निधी मंजूर केल्लो. तातूंतलो 3.08 कोटी रुपयांचो निधी गोंय सरकारान काडलो आनी पुराय 3.08 कोटी रुपयांचो निधी खर्च केलो. ते भायर गोंय सरकारान आपले 6.17 कोटी रुपया खर्च केले.

2020-21 त केंद्रान परतून 12.41 कोटी निधी मंजूर केलो. तातूंतलो 6.20 कोटी निधी गोंय सरकारान काडलो आनी 2.99 कोटी निधी खर्च केलो. गोंय सरकारान आपले 17.98 कोटी मोडले.

20121-22 त केंद्रान परतून 45.53 कोटी निधी मंजूर केलो. तातूंतलो 22.77 कोटी निधी गोंय सरकारान काडलो आनी 14.03 कोटी निधी खर्च केलो. राज्य सरकारान आपले 17.98 कोटी मोडले.

2022- 23 त केंद्रान 49.98 कोटी निधी मंजूर केलो. तातूंतलो एक रुपयाचोय निधी गोंय सरकारान काडूंक ना आनी आदल्या उरिल्ल्या पयशांतलो 11.04 कोटी निधी खर्च केलो. ते भायर गोंय सरकारान आपले 20.14 कोटी मोडले.

2023- 24 त केंद्रान 11.25 कोटी निधी मंजूर केलो. तातूंतले 11.25 कोटी निधी राज्य सरकारान काडलो आनी 11.76 कोटी निधी खर्च केलो. ते भायर गोंय सरकारान आपले 11.25 कोटी खर्च केले. 2024- 25 त केंद्रान 4.32 कोटी निधी मंजूर केलो. आतां मेरेन तातूंतलो एकूय रुपयाचो निधी सरकारान काडूंक ना, वा एक रुपयाय खर्च करूंक ना. ते भायर अजून मेरेन आपल्या बोल्सांतलो एकूय रुपया सरकारान हे गजाली खातीर वापरूंक ना.