भांगरभूंय | प्रतिनिधी
पणजीः एका सोनारान दुसर्या सोनाराक तोपी घालपाचो प्रकार पेडण्यां घडलो. राजू सोनार ह्या सुवर्णकाराका भांगराची वस्त करपाक पेडणेंचो सोनार रुत्वीक पंडुरकार हाणें पयशे आनी भांगर दिल्लें. मात राजू हाणें भांगर आनी पयशे मेळून रु. २३.३६ लाख मोलाचो माल घेवन पंजाबाक पळ काडलो. उपरांत पेडणें पुलिसांनी ताका थंय अटक केली.
पेडणें पुलिसांनी दिल्ले म्हायती प्रमाण, नागझरे रावपी रुत्वीक हांणी कागाळ केल्ली. तांणी देऊळवाडो- धारगळे रावपी आनी मुळचो गोडगिरी बेळगांवचो राजू सोनार (३६) हाका रु. १८.१६ लाख मोलाचें भांगर आनी रु. ५.२० लाख इतली रक्कम नव्यो वस्ती करपाक दिल्ली. मात राजून भांगर आनी पयश्यांचो स्वता खातीर वापर केलो.
कागाळ करप्यांक तोपी घाले उपरांत तो घरांतल्यान बेपत्ता जालो. तांत्रीक सर्वेक्षण आनी थळाव्यांचे मजतीन तो वर्सोला- गुरूदासपुर पंजाब हांगा लिपून बशिल्ल्याचें कळ्ळें. उपरांत पेडणें पुलिसांनी थंयच्या पुलिसांचे मजतीन राजू सोनाराची गुठली उखल्ली. ताका अटक करून गोंयांत हाडला, अशी म्हायती पेडणें पुलिसांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
