भांगरभूंय | प्रतिनिधी
पणजी : चोडणेंच्या उझुर्बा संस्थेन आयोजीत केल्ल्या कोंकणी गीत सर्तीचो निमणो खीण लागीं पावला. येता त्या आयतारा 22 वेर सांजवेळा सात वरांचेर पणजेच्या मिनेझिस ब्रागांझा सर्तींत निमणी फेरी आनी इनामां भेटवण सुवाळो जातलो.
हे सर्तींत सध्या 25 स्पर्धक आसात. 20 डिसेंबराक दनपरां 3 वरां मेरेन आॅनलायन वोटिंग आसा. ताच्या आदारान 10 स्पर्धक वेंचून काडटले आनी ते निमणे फेरयेंत वांटो घेतले. काल मेरेन 1750 लोकांनी 2000 मतां दिल्यांत. https://kwm.vangdda.org/top-25-finalists. हे वेबसायटीचेर मतदान करुं येता. स्पर्धकांनी 21 भाशांतल्या 108 पदांच्या आदारान कोंकणी पदां तयार करून गायल्यांत.
जैतिवंत जावपी 10 जाणांक 1 लाख 40 हजार रुपयांचीं इनामां, करंड, प्रमाणपत्र मेळटलें. उरिल्ल्या टाॅप 25 गायक, 40 गीतकारांक खास यादस्तीक आनी प्रमाणपत्र दितले. तशेंच पात्र थारिल्ल्या सगल्या स्पर्धकांक प्रमाणपत्र दितले. तशेंच हेर जायतीं इनामां आसात.
सर्तींत उमेश सरदेसाय, तुषार हेदे, सिमोन फर्नांडीस, राॅबर्ट डिसोझा, प्रणय डिसोझा, मायरन इस्तिबेरो, मोनिका फर्नांडीस, लाॅयड परेरा, जोशी मास्कारेन्हास, हेमंत अय्या, ग्लॅडीस व्हिक्टोरिया, डेविनो आल्मेदा, क्लेनिफा आल्मेदा, बेर्नाद डिसा, एलराॅय गोम्स हे गायक आसात. सर्तींत 79 इंग्लीश पदां, 29 हिंदी पदां घेवन ताचे वयल्यान स्पर्धकांनी कोंकणी पदां तयार केल्यांत. देवनागरी आनी रोमी लिपींत पदां मागयिल्लीं, पूण 13 पदां कन्नड लिपयेंतूय मेळ्लीं. हे सर्तींत हिंदू तशेंच क्रिस्तांव स्पर्धकांनी व्हड संख्येन वांटो घेतलो. वट्ट 117 पात्र प्रवेशिका आयल्यो, तातूंतले निमणे फेरये खातीर 25 वेंचून काडल्यो.
ही सर्त ना फायदो ना लुकसाण तत्वाचेर चोडणाच्या उजुर्बा टेक्नोलाॅजीस एलएलपी हांणी आयोजीत केल्या. स्पर्धकां कडल्यान फी घेवंक ना. सगल्यांनी हे सर्तीक हाजीर रावचें, असो उलो आयोजक व्हिन्सेंट तोस्कानो (97654 10020, [email protected]) हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
