भांगरभूंय | प्रतिनिधी
वास्को: हांगाच्या भाजी मार्केटांतल्या विक्रेत्यांनी कोयर शुल्क मुरगांव पालिकेक दिवपा संबंदी दोन दिसांची मुजत मागिल्ली. ती शुक्रारा (ता. २०) सोंपिल्ल्यान शुक्रार सावन संबंधितां आड कारवाय करपाचें मुरगांव पालिकेन थारायलां. शुक्रारा जर त्या विक्रेत्यांनी कोयराचें शुल्क दिवपाचें कबूल केल्यार कारवाय जावची ना. ताका लागून संबंदीत विक्रेते खंयचो निर्णय घेतात हाचे कडेन वास्कोच्या लोकांचें लक्ष आसा.
हांगच्या भाजी मार्केटांत भाजी, फळां, नाल्ल, कडधान्य माल तशेंच हेर विक्रेते तशेंच ल्हान हॉटेलां आसात. तांचो कोयर मुरगांव पालिका उखलता. ताका लागून पालिकेक कोयर शुल्क दिवपाची गरज आसा. तशेंच जायते जाण कोयर शुल्क दिनात. ताका लागून मुरगांव पालिकेक म्हयनोभर ९० हजरां परस चड महसूल सोडचो पडटा. फळ, भाजी विक्रेते आपलो कोयर एफ.एम गोम्स मार्गार बागायतदार संस्थे लागसारच्या रस्त्यार उडयतात. ताका लागन थंय दुचाकी उब्यो करपाक मेळनात. तशेंच हेर चालकांक आडखळ जाता. मुरगांव पालिका तांचो कोयर उखलता. मात तांचे कडल्यान कोयर शुल्क घेवपाक पावलां उबारिनाशिल्ली. मात आतां हे विशीं मुख्याधिकारी दीपेश प्रियोळकार हो प्रस्न गंभीरपणान घेतला.
हे विशीं संबंदीत विक्रेत्यांक पयलींच सुचवण्यो दिल्यात. ताका लागून कांय भाजी मार्केट संघाचे कांय पदाधिकार्यांनी मुख्याधिकार्यांची भेट घेतली. तांणी हे विशीं आमी हेर विक्रेत्यां कडेन चर्चा करून निर्णय घेतात. ताका लागून दोन दिसांची मुजत दिवपाची मागणी केल्ली. ते प्रमाण तांकां मुजत दिल्ली. हे विशीं विक्रेत्यांनी आपलो निर्णय कळोवंक ना, जाल्यार कारवाय जातली. ह्या मार्केटांतल्या किराणा माल विक्रेत्यांक म्हयन्याक १५० रु, ल्हान हॉटेल धनयांक ३०० रुपया जाल्यार फळ, भाजी विक्रेत्यांक ५०० रुपया असो कोयर शुल्क थारायल्यात. फळ, भाजी विक्रेत्यांचो कोयर व्हडा प्रमाणांत आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
