भांगरभूंय | प्रतिनिधी
म्हापशें ः नागवें- बार्देसाची २ हजार चौ. मी. जमीन बनावट कागदपत्रां वरवीं घेतिल्ल्या प्रकरणांत म्हापशें पुलिसांनी व्यंकटेश कृष्णा हेगडे (रा. बंगळूरू कर्नाटक) हाचे आड फटींगपणां आनी बनावटगिरीचो गुन्यांव नोंद केला.
हो फटींगपणाचो प्रकार १८ मे २०२२ आदीं घडलो. हे विशीं पुलिशेंत गुरगांव हरियाणाच्या माईंडटेक कॉम्पूसोफ्ट प्रा. लिमिटेड कंपनीचे अधिकृत प्रतिनिधी संजीव भाटीया हांणी कागाळ केल्या.
कागाळदाराचे कंपनीन नागवाच्या सर्वे क्रमांक ५१/२४ मदली २ हजार चौरस मिटर जमीन घेतिल्ली. हे जमनीचे मूळ धनी थॉमस मायकल फर्नांडीस आनी ताची घरकान्न लिना फर्नांडीस हिच्या नांवान बनावट कागदपत्रां तयार केलीं. तशेंच हे वारसदार खरे आशिल्ल्याचें सांगून भलत्यांकूच बार्देस उपनिबंधक कार्यालयांतल्या अधिकार्या मुखार सादर केले आनी वयले जमनीचें विक्रीपत्र आपल्या नांवाचेर करून जमीन हडप केली.
हे विशीं पुलिसांनी दुबावीत आरोपी आड भा. दं.सं.च्या ४१९, ४६४, ४६५, ४६७, ४६८, ४७१ आनी ४२० कलमान्वये गुन्यांव नोंद केला. फुडलो तपास पुलीस उपनिरीक्षक यशवंत मांद्रेंकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
