भांगरभूंय | प्रतिनिधी
मुख्यमंत्रीः गोंय मुक्तींतल्या 12 शहिदांच्या घरच्यांक दरेकी 10 लाखांची मजत
भांगरभूंय । प्रतिनिधी
पणजी : देश स्वतंत्र जालो तेन्नाच जर केंद्र सरकारान पावलां उखलून ऑपरेशन विजय मोहीम हातांत घेतिल्ली जाल्यार गोंय मुक्त जावपाक 14 वर्सांचो कळाव जावचो नासलो. देशा सयत गोंय मुक्त जाल्लें जाल्यार 74 जाणांचेर शहीद जावपाचो वेळ येवचो नासलो, अशें मुख्यमंत्री डॉ. प्रमोद सावंत हांणी म्हणलां.
गोंय मुक्ती दिसाच्या आदल्या दिसा खासा सुवाळ्यात 12 शहिदांच्या घरच्यांक मानपत्र तशेंच 10 लाखांचे अर्थीक मजतीचें वांटप जालें. मुख्यमंत्री डॉ. प्रमोद सावंत हांणी शहीदांच्या घरच्यांचो भोवमान केलो. ह्या वेळार मुख्यमंत्री उलयताले.
19 डिसेंबर 1961 ह्या दिसा पुर्तुगीज राजवटींतल्यान गोंय मुक्त जालें. भारत स्वातंत्र्य जाले उपरांत गोंय मुक्त जावपाक 14 वर्सां लागलीं. गोंय मुक्तींत हौतात्म्य आयिल्ल्या 74 शहिदांचो सरकारान सोद घेतला. तातूंतल्या 12 जाणांक गोंय मुक्ती दिसाच्या आदल्या दिसा अर्थीक मजत दिवपा सयत तांच्या घरच्यांचो भोवमान केला. पत्रादेवी जावपी हुतात्म्यांचे यादस्तुकेचेर 74 शहिदांचो उल्लेख जातलो. गोंय मुक्ती खातीर जे 74 जाण शहीद जाल्यात तांच्या घरच्यांक आतां मेरेन कसलोच लाव जावंक ना. तांच्या घरच्यांचो भोवमान करपा सयत 10 लाखांची अर्थीक मजत दिवन तांच्या योगदानाची दखल पयलेच खेपे सरकारान घेतल्या. सुटके झुजाऱ्यांच्या भुरग्यांक नोकऱ्यो दिवपाची येवजण आसा. सुटके झुजाऱ्यांचे दुसरे पिळगे खातीर नोकऱ्यो दिवप शक्य जावचें ना. हाका लागून शहीद जाल्ल्या हुतात्म्यांच्या घरच्यांक अर्थीक मजत दिवपाचें सरकारान थारायलां. हेर शहिदांच्या घरच्यांचो सोद घेवन तांकां लेगीत अर्थीक मजत दितले. इतिहास विसरता तो देश फुडें वचूं शकना. ज्या सुटके झुजाऱ्यांच्या भुरग्यांक नोकरी मेळ्ळ्या तांणी मुक्तीदीस कार्यावळीक हाजेरी लावन सुटके झुजाऱ्यांच्या योगदानाची याद करपाक जाय, अशें मुख्यमंत्री डॉ. प्रमोद सावंत हांणी सांगलें.
सुटके झुजाऱ्यांचे संघटणेचे अध्यक्ष रेहिदास देसाय, शहीद शेषनाथ वाडेकर हांच्या कुटुंबांतले कुणाल वाडेकार आनी प्रदीप हिरवे हांचीं भाशणां जालीं. बाळा राया मापारी, बसवराज हुडगी, शेषनाथ वाडेकार, तुळशीदास हिरवे, सखाराम शिरोडकार, रोहिदास मापारी, यशवंत अगरवाडेकार, रामचंद्र नेवगी, बापू गांवस, लक्ष्मण वेलिंगकार, केशवभाई टेंगसे, परशुराम आचार्य ह्या शहिदांच्या घरच्यांक अर्थीक मजत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
