भांगरभूंय | प्रतिनिधी
वाटेर आडावन पदाधिकार्यांक पुलिसांनी घेतले ताब्यांत
भांगरभूंय | प्रतिनिधी
पणजीः अदानी आड काँग्रेसीन राजभवनाचेर मोर्चा व्हेलो. मात पुलिसांनी तांकां वाटेरूच आडयले आनी तांकां राजभवनांत वचपाक दिवंक ना. परिस्थिती हाता भायर गेल्ल्यान पुलिसांनी गोंय प्रदेश काँग्रेस अध्यक्ष अमीत पाटकार, विरोधी पक्ष फुडारी युरी आलेमांव हांचे सयत काँग्रेसीच्या हेर पदाधिकार्यांक ताब्यांत घेतले. तेन्ना हो प्रकार विरोधकाचो आवाज दामून दवरपाचो यत्न आसा, अशें पाटकार हांणी सांगलें.
अमीत पाटकार, युरी आलेमांव, प्रदेश उपाध्यक्ष सुनील कवठणकार हांणी हेर काँग्रेस पदाधिकारी आनी कार्यकर्त्यां सयत दोनापावल सर्कल ते राजभवना मेरेन मोर्चो काडपाक सुरवात केली. अमेरिकेंत अदानी आनी तांच्या सहकार्यां आड भ्रश्टाचाराच्या आरोपांचेर अमेरिकेच्या न्याय खात्यान केल्ले कारवाये विशीं अदाणी हांचो निशेध करपा खातीर हो मोर्चा काडिल्लो.
काँग्रेस फुडार्यांनी जबरदस्तीन पुलीस बंदोबस्त तोडून फुडें वचपाचो यत्न केल्लो तेन्ना पुलिसांनी बायलां पुलिसांक फुडें काडले असो आरोप काँग्रेसीन केला. हाचेर उपाय म्हूण काँग्रेसीची बायलां फुडारी फुडें आयलीं आनी बायल पुलीस आनी बायल कार्यकर्त्यां मदीं बऱ्योच लटाफटी जाल्यो. उपरांत परिस्थिती हाता भायर गेल्ल्यान पुलिसांनी अमीत पाटकार, युरी आलेमांव आनी सुनील कवठणकार हांकां उखलून पुलिसांचे बशींत घालून ताब्यांत घेतले.
बशींत उलयतना पाटकार हांणी सांगलें, दोन दिसां पयलीं सुलेमान सिद्दीकी हांणी पुलीस कोठडेंतल्यान फुज्जो काडल्यो. पूण सरकार हे विशीं उलोवचें सोडून आमचे पदाधिकारी जांणी ही घडणूक उक्ताडार हाडल्या, तांचेर कारवाय करता.
अमेरेकेंत अदानी आड लांच प्रकरणांत भ्रश्टाचाराचे आरोप जाल्यात. ताचो निशेध करपा खातीर देशव्यापी आंदोलन चलता आनी तांचो भाग म्हूण आमी राजभवनाचेर मोर्चो काडिल्लो. आमकां राज भवनांत वचून राज्यपालांक मेळपाचें आशिल्लें. मात हें मोदी आनी अदानीचें सरकार सदांच पुलिसांक मुखार काडून गोंयकार आनी देशाच्या नागरिकांचेर अन्याय करता, असो आरोप पाटकार हांणी केलो.
खंयतरी विरोधकांचो आवाज दामून दवरपाचो यत्न चल्ला. काल संसदेंत देशाची घटना बरोवपी बाबासाहेब आंबेडकर हांचो अपमान जालो. जी टिका देशाचे गृहमंत्री आंबेडकराचेर केल्या ताचो आमी निशेध करतात. हाचे वयल्यान सिद्ध जाता, मोदी सरकार फक्त तानाशाही करून लोकांचो आवाज दामपाचो यत्न करता, असो आरोप पाटकार हांणी केलो. जेन्ना विरोधी पक्ष फुडारी युरी आलेमांव हांणी उलोवपाक सुरवात केली तेन्ना पुलिसांनी बस सोडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
