सगळे नगरसेवक येवनूय सांगें पालिकेची बसका रद्द

भांगरभूंय | प्रतिनिधी

कितेंतरी भानगड आशिल्ल्याचो विरोधी नगरसेवक मॅश्यू डिकॉस्टाक दुबाव

भांगरभूंय । प्रतिनिधी

सांगें: सांगें नगरपालिकेची बसका बुधवारा 18 डिसेंबराक सकाळीं आपयल्ली. हे बसकेक सगळे धावूय नगरसेवक हाजीर रावून लेगीत बसका रद्द करपाची घडणूक घडली. ही बसका पालिकेच्या सभाघरांत दवरिल्ली, पूण आयत्या वेळार सभाघर उपजिल्होधिकारी मिलिंद वेळीरप हांणी सभाघर बुकींग आशिल्ल्यान ही बसका नगराध्यक्ष अर्चना गांवकार हांच्या कॅबिनांत आयोजीत केली.

नगरसेवकांक बसकेचें निमंत्रण (पत्रक) दिल्लें, त्या पत्रकांत सभाघरांत बसका जातली अशें म्हणिल्लें. जेन्ना उपजिल्होधिकाऱ्यान सभाघर बूक केलांच जाल्यार नगरसेवकांचें स्पेशल रूम आसात, त्या रुमांत बसका कित्याक दवरूंक ना? नगराध्यक्षाच्या कॅबिनांत कित्याक दवरली? अशे प्रस्न उपस्थीत केले उपरांत मात्सो वाद जालो आनी बसका रद्द करची पडली.

नगरपालिकेचे पडीक सुवातेंत भगवान बिरसा मुंडा हांचे 150 वे जयंती निमतान पुतळो बांदचो आनी नगरपालिकेंत छत्रपती शिवाजी महाराज, डॉ. जॅक सिक्वेरा आनी शाबू देसाय हांचे फोटो लावचे, असो थाराव हे बसकेंत विरोधी नगरसेवक मॅश्यू डिकॉस्टा मांडपाचे आशिल्ले. तशेंच नगरपालिकेचे सुवातेचो प्रस्न, नगरपालिकेची जमनीर केल्लें अतिक्रमण हे विशय लेगीत बसकेंत येवपाचे आशिल्ले. हे सगळेच प्रस्न म्हत्वाचे आशिल्ले. पूण हातूंत कितें तरी भानगड आशिल्ल्यान ही बसका रद्द केली, अशें मॅश्यू डिकॉस्टा हांणी सांगलें. लोकांक कितले तरी प्रस्न सोडोवपाचे आसात. पूण लोकांचे प्रस्न सोडोवपाची नगरपालिकेची तयारी ना. हेच खातीर बसका रद्द केल्या. आमी लोकांचे प्रस्न सोडोवपाक बांदील आसात. भगवान बिरसा मुंडा हांचो प्रस्न लावन धरतले, अशें डिकॉस्टा हांणी सांगलें.

वाद वाडचो न्हय म्हूण बसका रद्दः नगराध्यक्ष

सात दिसां आदींच बसकेचे मुद्दे काडून आमी दर नगरसेवकाक नोटीस धाडिल्ली, पूण उपजिल्होधिकारी मिलींद वेळीप हांणी कार्यावळी खातीर सभाघर आरक्षीत केल्ल्यान मात्सी आडखळ जाली. तेच खातीर आपल्या कॅबिनांत बसकेचें आयोजन केलें. तातूंत कितें चुकलें? तेच खातीर एका नगरसेवकान आवाज चडयलो. हो वाद वाडचो न्हय हे खातीर ही बसका रद्द केली. फुडले बसकेची तारीख रोखडेच जाहीर करतले, अशें नगराध्यक्ष अर्चना गांवकार हांणी सांगलें.