भांगरभूंय | प्रतिनिधी
तिगांचे कंसेंट टू ऑपरेट परवाने रद्द, चार जाणांक परवाने रद्द करपाची नोटीस
पणजी ः व्हड आवाजात संगीत वाजोवन आवाज प्रदुशण करपी बार आनी रेस्टॉरंट तशेंच आस्थापनां आड प्रदुशण नियंत्रण मंडळान कारवाय करपाची मोहीम सुर केल्या. व्हड आवाजात संगीत वाजोवपी तीन आस्थापनांचे कंसेंट टू ऑपरेट परवाने रद्द केल्या. तशेंच हेर चार आस्थापनांक कंसेंट टू ऑपरेट रद्द करपा संबंदी नोटीस जारी केल्या.
ही कारवाय वायु प्रदुशण आनी नियंत्रण कायदो, 1981 च्या कलम 31 (ए) खाला केल्या. मेसर्स टेल्मा डिसा (शिवोले), मेसर्स नोहा (हणजूण), मेसर्स डायज (हणजूण) हांचे कंसेंट टू ऑपरेट परवाने रद्द केल्या. तशेंच दिसाक 10 हजार रुपया प्रमाण ३० हजार रुपयांचो दंड कित्याक लावचो न्हय अशें विचारुन नोटीस जारी केल्या. ह्या आस्थापनांक हे विशीं स्पश्टीकरण दिवचें पडटलें.
ते भायर मेसर्स विस्ता मारे (हणजूण), डीज (शिवोले), डायना बिल्डवेल (हणजूण) आनी हीलटॉप (वागातोर) हांकां सध्या खातीर आपलीं आस्थापनां बंद दवरपाचे आदेश दिला. कंसेंट टू ऑपरेट परवाने रद्द करपा खातीर वयल्या चारुय आस्थापनांक नोटीस जारी केल्या. 20 डिसेंबराक तांकां हे नोटीस संबंदी प्रदुशण नियंत्रण मंडळा मुखार आपली बाजू मांडची पडटली. हाचे उपरांत कंसेंट टू ऑपरेट संबंदी निर्णय घेतले. हे संबंदीचे आदेश प्रदुशण नियंत्रण मंडळान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
