भांगरभूंय | प्रतिनिधी
विज्ञान भायर भोंवता. हांव भितर भोंवता. हे भितरले भोंवडेक हांव ध्यान साधना म्हणटा. ह्या भितरल्या सफरी खातीर तुका तीन सादे टप्पे गांठूक जाय. चवथो मागीर आपसूक, आपले आपूण घडटा. पयल्या टप्प्यांत तुज्यो हालचाली नियाळप म्हळ्यार तुजी कूड आनी तिची कामां हांची पळोवणी करप. देखीक, चलप, लांकडां फोडप, बांयचें उदक काडप बी. तुवें निखटो गवाय जाप.
उपरांत जेन्ना तूं तुज्या कुडीच्यो क्रिया तिरायत नदरेन पळोवपाक सक्षम जातलो तेन्ना मागीर दुसरो टप्पो सुरू जातलो. आतां तुज्या चित्ताच्यो (mind) हालचाली पळय. त्यो म्हणजे चिंतनां, सपनां, कल्पना बी. निखटे पळोवप. त्रयस्याचे नदरेन. जश परी तूं एका रस्त्या कुशीक उबो आसा, आनी त्या रस्त्या वेल्यान तुज्या चिंतनांची मिरवणूक वता, आनी तूं ती तटस्थ नदरेन पळयता. भितर वांटो घेना. तूं निखटो एक हारसो जा. पडबींब करपी पूण कसलीच प्रतिक्रिया करिना असो. कारण हारसो केन्नाच अभिप्राय दिना. सुंदर मुखामळ आसल्यार ‘वाव!’ म्हणना. विद्रुप मुखामळ आसल्यार ‘देवा सायबा’ म्हणना. हारसो हो जो कितें मुखार येता ताचे फक्त पडबींब दाखयता. जिस्त तस्सो तुका जावचो पडटलो. जशी जशी तुजी पळोवणी वाडत रावता, तस-तशी आगळे आनी नवे अणभव येत रावतात. तुजी चिंतनां उणीं जायत वतात. पळोवणी वाडटात तशीं चिंतनां देंवतात! प्रमाण एक सारकें उरता. देखीक जर तुजें पळोवप धा प्रतिशत जालें जाल्यार तुची चिंतनां णव्वद प्रतिशत जाता. जर तुजी पळोवणी (awareness) णव्वद प्रतिशत जाली जाल्यार मागीर फक्त धा प्रतिशत चिंतनां उरतात. शेंप्रतिशत पळोवणी जाली जाल्यार मागीर थंय निखटे ‘कांयच ना’ उरता! ही चित्त ना (no-mind) ची अवस्था. हें तिसऱ्या आनी निमाण्या टप्प्याचें दार.
आतां तुज्या सुक्षीम भावना कडेन म्हळ्यार लहारां कडेन पळय. ह्यो भावना मनांतल्यान उदेल्ल्यो आसतात. ह्या लहारां इतलीं चिंतनां सुक्षीम नासात. लहरां सुखदिण्यो वा दुखदिण्यो आसतात. म्हणटकूच सुरवेक तूं कुडी कडेन, उपरांत चित्ता कडेन आनी निमाणे मना कडेन संबंदीत उरता.
आनी जेन्ना तूं ह्यो तिनूय अवस्था पळोवपाक समर्थ जाता, तेन्ना मागीर चवथी आपसूक, आपले-आपूण निर्मता. अचकीत कितें तरी भव्य दिव्य घडटा. तूं तुज्या अस्तित्वाच्या सामको मदेकांत उबो आसता. आतां बोध घेवपा सारकें कांयच उरिल्लें नासता. तुका आत्मबोध जाल्लो आसता. हे अवस्थेक समाधी वा परमानंद म्हणूं येता. हो अणभव परमोच्च. ताच्या उपरांत आनीक कांयच आसना. तुज्या भितरल्या यात्रेची ही पुर्णताय आसता. तूं तुज्या निजाच्या घरा पावता!
ही म्हजी शिकवण. ती पुरायपणान विज्ञानीक आसा. ती प्राप्त करपाक भावार्थ नाका. फक्त प्रयोग करपाची तयारी जाय. आनी हांव कोणाचेरूच विस्वास दवर म्हूण सांगना. हांव इतलेंच सांगता की प्रयोग कर आनी अणभव घे म्हूण.
हांव तुमचे वरी एक सामान्य मनीस. देखून जे प्रमाण ही वयली प्रचिती म्हाका आयली तशी ती तुमकांय बी येवंक शकता. हांव कोणतरी प्रेशीत वा सोडवणदार वा देवाचो अवतार आसा असो हांव दावो करिना. हांव कोण तरी खाशेलो आसा अशेंय बी म्हणिना. फक्त फरक इतलोच की तुमी अजुनूय न्हिदल्यात आनी हांव जागो जालां. आयज ना फाल्यां तुमीय बी अशेच जागे जावचे ही सदित्सा.
मूळ लेखक : ओशो
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
