भांगरभूंय | प्रतिनिधी
तिसऱ्या दिसा लोकांनी घेतलो उत्स्फूर्त आनंद
पणजी: सेरेंडिपिटी कला महोत्सव 2024 च्या तिसऱ्या दिसा शाश्वतताय, सांस्कृतीक कल्पकताय आनी संगिताच्या आगळ्या वेगळ्या सादरीकरणान उत्सव पळोवंक मेळ्ळो. ह्या सादरीकरणांत मधूर पडवळ हांच्या भारताच्या लिपिल्ल्या सुरांचो सोद ह्या विशेश प्रकल्पाचो आस्पाव आशिल्लो. जाका भारतीय परफॉर्मींग रायट सोसायटी (आयपीआरएस) चो तेंको आशिल्लो. फोक्स-वैगन हांणी सादर केल्ल्या संगीत रचनांत गुजरात सावन केरळ मेरेनच्या भारताच्या अस्तंत्या दर्यादेगेचो आवाज वाद्यांच्या सहाय्यान आनी प्रभावी कथानका सयत एकठांय सादर केलो. आझाद मैदानार जाल्ले हे कार्यावळींत मधूर पडवळ हांणी मोनेळ घालपी संगीत अणभव दिलो.
सलील चतुर्वेदी, ठुकराल आनी टाग्रा हांणी ‘मल्टिप्ले’ माळे खाला ‘पोएम्स ऑन द मूव्ह’ प्रकल्पान सादी कॅब रायडूय काव्यात्मक प्रवासांत रुपांतरीत केली. घोळट्या शटल्सांत लायव्ह कविता वाचन आनी सादरीकरणा वरवीं तांणी दीसपट्टे जिणेंत काव्याक हाडलें. अनामिका जोशी, दीपाली सुतार आनी रोशल डिसिल्वा हांचे सारक्या कवयित्रींच्या आस्पावाक लागून पणजेंतल्या ह्या प्रकल्पान शाराचे गतींत काव्यांची रंगत हाडली.
कला म्हणल्यार नातें जोडपी आसा. ह्या प्रकल्पा वरवीं आमकां लोकांक तांच्या भोंवतणा कडेन जुळोवन दिवपाक प्रोत्साहीन करपाचें आसा अशें ठुकराल हांणी सांगलें.
आनीक एका लक्ष ओडून घेवपी प्रकल्पांत अभावांतल्यान संपन्नते कडेन ह्या संदीप संगारूंच्या सादरीकरणाचो आस्पाव आशिल्लो. जाका रॉयल एनफिल्डचो तेंको आनी सेरेंडिपिटी आर्ट्स फावंडेशना कडल्यान नियुक्ती मेळिल्ली. सांबा स्क्वेर हांगा जाल्ल्या ह्या प्रकल्पांत लडाखांतल्या शाश्वत कुशळटाय कथां वरवीं स्थापत्यकृतींतल्यान आनी थळाव्या कारागिरांच्या सादरीकरणा वरवीं मांडली. त्सेरींग अँगचूक आनी स्कालझांग तुंडूप हांचे सारक्या कारागिरांनी वांटो घेवन अभवांतल्यान निर्माण जावपी सर्जनशीलताये विशीं चर्चा घडोवन हाडली.
पोरण्या जीएमसी कॉम्प्लेकांतल्या फूड लॅबांत फुडले पिळगे खातीर गोंयच्या खाद्य संस्कृतायेचो पुनर्निर्माण ह्या प्रकल्पान गोंयच्या खाद्यसंस्कृतीच्या विकासाचेर भर दिलो. स्मिता मेन हांच्या क्युरेशन खाला जाल्ल्या पॅनेल चर्चेंत समुद्री शैवाल उत्पादक, हॉटेल वेवसायीक आनी बार तज्ञ वांटेकार जाल्ले. गोंयच्या परंपरीक खाद्य संस्कृतीच्या सांबाळा खातीर आनी नवकल्पनां खातीर उपाय येवजण्यांचेर चर्चा जाली.
डायरेक्टोरेट ऑफ अकावंट्स हांगा युकी आओकी आनी एच सेकेरिस्सा हांच्या फुडारपणा खाला दोन दिसांच्या सुपर स्ट्रेंजर वर्कशॉप घेतलो. पणजे मार्केटांत सादर जाल्ल्या कार्यावळीन समकालीन नृत्यतंत्र शिकपा खातीर आनी आंतरराष्ट्रीय कोरिओग्राफीक शैली कडेन जोडून दिवपा खातीर वांटेकार जाल्ल्यां खातीर एक वेगळीच संद निर्माण केली.
सेरेंडिपिटी कला महोत्सवाच्या तिसऱ्या दिसा विवीध कला प्रकारांचे आनी समाजीक, सांस्कृतीक आनी पर्यावरणीय विशयांचे एकत्रीकरण पळोवंक मेळ्ळें. जाका लागून हाजीर आशिल्ल्यांनी स्फूर्त आनी प्रेरणा अणभवली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
