भांगरभूंय | प्रतिनिधी
पणजी ः भलायकी खात्यान सुरू केल्ली मुफत ‘आयव्हीएफ’ उपचार पद्दत येसस्वी जाल्या. ह्या तंत्रज्ञानाचो उपेग करून गोंय वैजकी म्हाविद्यालयांत (गोमेकॉ) पयले आयव्हीएफ चलयेक जल्म दिवपाक दोतोरांक येस मेळ्ळें. भलायकी मंत्री विश्वजीत राणे हांणी समाज माध्यमा वरवीं ही म्हायती दिल्या.
हे संबंदीं आधुनीक वैजकी उपचारा वरवीं लोकांक मजत करपाक भलायकी खातें बांदील आसा अशें राणे हांणी सांगलें. गोमेकॉ गोंयांतल्या जोडप्यांक मुफत आयव्हीएफ उपचार दिवन दरेका घरांत खोस हाडटा. पयले आयव्हीएफ चली सिजेरियन पद्दतीन जल्माक आयलां.
मेळिल्ले म्हायती प्रमाण, ही सेवा 1 सप्टेंबर 2023 सावन सुरू जाल्ली. मुफत आयव्हीएफ उपचार दिवपी गोंय हें देशांतलें पयलें राज्य. ह्या उपचारा खातीर शंबरां परस चड दुयेंतींची नोंदणी जाल्या. जाल्यार आजूनूय कांय जोडप्यांक हाचे वरवीं बरी खबर मेळपाची शक्यताय आसा. ही उपचार पद्दत मेळिल्ल्या पयल्या 25 दुयेंतींतल्या 10 दुयेंतींची गुरवारपणाची सकारात्मक चांचणी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
