भांगरभूंय | प्रतिनिधी
पोरणें गोंय पुलिसांनी केली दोन वरां चवकशी
पणजी : सिद्दीकी सुलेमान खानाचो व्हिडियो व्हायरल करचे पयलींच आयतारा पुलीस महासंचालकांक हांवें व्हिडियोची म्हायती दिल्ली. तो पेन ड्रायव्हूय दिल्लो. तपासा वेळार सहकार्य करपाची म्हजी तयारी आसा. पुलीस सुलेमान प्रकरणाचो तपास चेपणा खाला करतात आनी चवकशे वेळार विरोधकांक सतायतात, असो गंभीर आरोप कॉंग्रेस उपाध्यक्ष सुनील कवठणकार हांणी केलो.
समन्सा प्रमाण सुनील हांणी आयज पोरणें गोंय पुलीस स्टेशनांत चवकशे खातीर हाजेरी लायली. दोन वरां तांची चवकशी जाली. ह्या वेळार तांचे वांगडा आपचे वाल्मिकी नायक, कॉंग्रेसीचे तुलियो डिसोझा हजर आशिल्ले. घर खंय आसा, घरांत कितलीं वर्सां रावता? अशे तरेचे प्रस्न जाचो तपासा कडेन कसलोच संबंद ना ते पुलिसांनी आपल्याक विचारले. पुलिसांनी मोबायलाचीय मागणी केल्ली. मोबायल दिवपाक हांवें न्हयकार दिलो. अटकपूर्व जामिना खातीर आपूण अर्ज करचो ना. अटकेक तोंड दिवपाची म्हजी तयारी आसा, अशें सुनिल कंवठणकार हांणी चवकशे उपरांत पत्रकारां कडेन उलयतना सांगलें. सिद्दीकी सुलेमानान पुलिसां सयत एका आमदाराचेरूय आरोप केल्यात. अशें आसतना पुलीस वा आमदारांची जायनासतना विरोधकांची चवकशी जाता. पुलीस चेंपणा खाला तपास करतात. विरोधक सतायतात असो आरोप तांणी केलो.
सिद्दीकी सुलेमान खानाचो व्हिडीयो आशिल्लो पेन ड्रायव्ह आयतारा म्हाका मेळ्ळो. रोखडीच पुलीस महासंचालकांक फोना वेल्यान ताची म्हायती दिली. डीआयजी शर्मा फोन करतले अशें तांणी म्हाका सांगलें. व्हिडीयो व्हायरल केले उपरांत डीआयजी शर्मा हांणी फोन करून एक पुलीस व्हिडीयो आशिल्लो पेन ड्रायव्ह व्हरपाक येतलो अशें सांगलें. उपरांत रातीं उसरां पुलीस निरीक्षक दीपक पेडणेंकार पेन ड्रायव्ह व्हरपाक घरा आयलो. तेन्ना हांव न्हिदिल्लों. दुसर्या दिसा प्रत्यक्ष हांवेंच व्हिडीयो आशिल्लो पेन ड्रायव्ह पुलिसांक दिलो, अशे कवठणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
