सगले बरे, पूण न्हय एक ल्हान भुरगो…..

भांगरभूंय | प्रतिनिधी

माचयेर चडून काचाबूल जायनासतना उलोवप सगल्यांकूच शक्य जायना. मात हे धाकटुलें चली नातलांचे सुटये पयलीं शाळेन आयोजीत केल्ले कार्यावळींत बरेंच आत्मविस्वासान उलयता. तें खूब उक्त्या मनाचें, प्रामाणीक आसा. मात ताका फाटल्यान उबी आशिल्ली ताची टिचर आडायता आनी मायक काडून घेता. पूण तें आबूज जायना, मुमुरखें हांसत नाचत नाचत भितर वता. हे चलयेचो हो व्हिडियो, रिल फाटलें सप्तकभर सगलेच शॅर करीत आसात. लेबनाॅन फाॅरएव्हर आॅफिशलाच्या जिना म्युटोन जेकोबसन हांणी तशेंच हेर शेंकड्यांनी नेटिझन्सांनी व्हिडीयो शॅर केला. तीन कोटी लोकांनी तो सध्या पळयला. पळोवप्यांचो आंकडो वाडत आसा. परत परत पळयन रावपा सारको तो व्हिडियो, हें मात दुबावविरयत.

काळ्या चकचकपी कपड्यांतलें हे चली उबें आसा. ताची टिचर ताची वळख करून दिता, इतल्यान तें मायक घेवन उलोवपाक लागता. घडये ताका उलोवपाची उमळशीक लागिल्ली आसतली. तें म्हणटा, “I am very proud of myself and all of my other friends inside my class. my class is really sweet except… one little boy…And I need to tell you…”. (म्हाका म्हजो खूब अभिमान दिसता आनी म्हजे क्लासींतल्या सगल्या इश्टांचो. म्हजी क्लास खरेंच गोड… पूण न्हय एक ल्हान भुरगो… म्हाका तुमकां सांगपाचें आसा की……). इतल्यान तिची टिचर आतां पुरो म्हणीत मायक काडून घेता. सगले हांसता, पूण तें सान चली हात हालयत, नाचत थंयच्यान वता.
घडये तें चल्याचें नांव सांगपाचें आशिल्लें काय, तो मस्ती बी करतालो काय, अशे साबार प्रस्न प्रेक्षकांक पडटात. तें चली ताच्या वर्गांतलें सगल्यांत प्रामाणीक चली आसतलें. उलयतना ताणें खांप्या वक्त्या प्रमाण पाॅझ बी घेवन, बोट बी दाखयत उलोवप केलां.
ह्या व्हिडियोचेर साबार जाणांनी प्रतिक्रिया दिल्यात. कोण म्हणटा, हो मनीस हक्काचो अपमान. थोड्यांनी ताका आत्मविस्वासाचें राजदूत म्हणलां.

(व्हिडियो- फेसबुकाच्या बरेपणान)

व्हिडियो पळोवपाक सकयल दिलां तें लिक टॅप करात. मागीर मॅसेज येतली थंय ‘कंटिन्यू’ टॅप करात.

सगले बरे, पूण न्हय एक ल्हान भुरगो…..