भांगरभूंय | प्रतिनिधी
न्यायालयान मागल्या सरकारा कडल्यान जाप
नवी दिल्ली, खबरां संस्था: निर्भया सामूहीक बलात्कार- खुनाच्या प्रकरणाक १२ वर्सां पुराय जाल्या. सोमारा सर्वोच्च न्यायालयांत एक याचिका दाखल केली. हातूंत बलात्काराच्या आरोपींक नपुसंक करपाची मागणी केल्या. बायलांचे सुरक्षितताये विशीं मार्गदर्शक तत्वां तयार करप, कायदे सुदारप हाचे सयत हेर २० मागण्योय केल्यात.
न्या. सूर्यकांत आनी न्या. उज्ज्वल भुयान हांच्या खंडपीठान याचिका स्वीकारतना म्हणलें, ही मागणी सामकी क्रूर आसा. हे याचिकेचेर न्यायालयान केंद्र सरकाराचीं विवीध मंत्रालयां आनी विभागांक नोटिसो धाडून तांची जाप मागल्या. सुप्रीम कोर्ट वुमन लॉयर्स असोसिएशन (SCWLA) हे बायलां वकिलांचे संघटणेन याचिकेंत भौशीक इमारती आनी जायत्या सुवातांचेर सीसीटीव्ही कॅमेरे बसोवपाची, ओटीटी आनी हेर ऑनलायन अश्लील मजकूर, व्हिडियोंचेर बंदी घालपाची मागणी केल्या.
असोसिएशनची अध्यक्ष, ज्येश्ठ वकील महालक्ष्मी पवानी हांणी सांगलें : निर्भया ते अभया (कोलकात्याची आरजी कर बलात्कार-खून पिडेस्त) मेरेनच्या काळांत कांयच बदल जावंक ना. रस्त्या पसून घरा मेरेन बायलांचेर बलात्कार जातात. निर्भया प्रकरणा उपरांत कायदे खर जाल्यात. मात ते चालीक लागूंक नात. बलात्कार प्रकरणाची मिडिया ट्रायल जाय मेरेन देशाक जाग येना.
तांणी नॅशनल सेक्स ऑफेंडर्स रजिस्ट्री सारकें ऑनलायन प्लॅटफॉर्म तयार करपाची मागणी केल्या. बलात्कार करपी गुन्यांवकारांचो डेटा तातूंत दवरचो, जो सगळ्यो बायलो वाचपाक शकतलीं. रशिया, पोलंड, दक्षीण कोरिया, पाकिस्तान, इंडोनेशिया, तुर्की आनी अमेरिकेंतल्या आठ राज्यां सयत जायत्या देशांनी लैंगीक गुन्यांवां खातीर निर्बंध आनी नसबंदी गरजेचे आशिल्ले कायदे लागू केल्यात.
मार्गदर्शक तत्वां जारी केल्लीं
बायलांचे सुरक्षितताये विशीं सर्वोच्च न्यायालयान ह्यान पयलींच जायत्या प्रकरणांनी मार्गदर्शक तत्वां जारी केल्लीं. हालींच, न्या. बी व्ही नागरत्ना हांच्या खंडपीठान सगळ्या सरकारी कार्यालयांनी पाॅश (लैंगीक छळ प्रतिबंधक) कायद्या खाला समिती स्थापन करपा वांगडां जायत्यो सुचवण्यो दिल्यात.
२०१२ तलें निर्भया प्रकरण
१६ डिसेंबर २०१२ दिसा दिल्लीक निर्भयाचेर ६ जणांनी सामुहीक बलात्कार केल्लो. तिची भलायकी गंभीर जाले उपरांत २७ डिसेंबराक ताका उपचारा खातीर सिंगापुरा व्हेल्लें. २९ डिसेंबराक थंयच्या मावंट एलिझाबेथ हॉस्पिटांत ताका मरण आयिल्लें. निर्भयाच्या स मदल्या चार आरोपींक फाशी दिली. तर तिहार बंदखणींत एकल्यान आत्महत्या केल्ली. तेन्ना हें प्रकरण खूब गाजिल्लें.
ऑगस्टांत आरजी कार बलात्कार प्रकरण
आरजी कार हॉस्पिटलाच्या आपत्कालीन इमारतीच्या सेमिनार हॉलांत ९ ऑगस्टाक सकाळीं ३१ वर्सां पिरायेचें प्रशिक्षणार्थी दोतोराची कूड सांपडली. ती नायट ड्युटीचेर आशिल्ली. तिचे गुप्त भाग, दोळे आनी तोंडांतल्यान रगत येतालें. तिचें मानेचें हाडूय तुटिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
