भांगरभूंय | प्रतिनिधी
पणजीः शाळेंत वचनाशिल्ल्या भुरग्यांची संख्या उणी आशिल्ल्यां मदीं गोंय देशांत दुसरे सुवातेर आसा. शिक्षणीक वर्स 2024- 25 त गोंयांतलीं 148 भुरगीं शाळेंत वचपाक शकलीं नात. पुराय देशांत शाळेंत वचनासिल्ल्या भुरग्यांची संख्या वट्ट 11.70 लाख इतली आसा. केंद्रीय शिक्षण राज्यमंत्री जयंत चौधरी हांणी लोकसभेंत दिल्ले जापेंतल्यान ही म्हायती मेळ्ळ्या. हे विशीं खासदार श्रीभारत मथुकुमिल्ली हांणी अतारांकीत प्रस्न उपस्थीत केल्लो.
जापेंत दिल्ले म्हायती प्रमाण चालू शिक्षणीक वर्सांत सिक्कीमांत सगळ्यांत उणी म्हणल्यार 74 भुरगीं शाळेंत वचनात अशीं आसात. देशांत सगळ्यांत चड उत्तर प्रदेशांत भुरगी शाळेंत वचनात. शाळेंत वचनाशिल्ल्या भुरग्यांच्या 67 टक्के म्हणल्यार 7.84 लाख भुरगीं हीं उत्तर प्रदेशांतलीं आसात. ते उपरांत झारखंडांत 65 हजार, आसामांत 63 हजार, गुजरातांत 54 हजार भुरगीं शाळेंत वचनात. केंद्रशासीत प्रदेशांत लडाख आनी लक्षद्विपांत शाळेंत वचनाशिल्ल्या भुरग्यांची संख्या शुन्य आसा, अशें जापेंत म्हणलां.
हे विशीं गोंयचे शिक्षण संचालक शैलेश झिंगडे हांणी सांगलें, गोंयांत शिक्षणाक म्हत्व आशिल्ल्यान थळाव्या लोकांचीं भुरगीं शाळेंत वतातूच. सध्या गोंयांत जी शाळेंत वचनाशिल्लीं भुरगीं आसात ती चड करून स्थलांतरीत कामगारांचीं आसात. तातूंत नुस्तेमारी बोटींचेर वा पर्यटन मोसमांत हॉटेलांत काम करपी कामगारांची संख्या चड आसा. अश्या भुरग्यांक आमी समग्र शिक्षा अभियाना खाला शिक्षण दितात. मात खूब खेपे गोंयांतलें काम सोंपले उपरांत पालक आपल्या भुरग्यांक घेवन आपल्या गांवांत परतून वतात. ताका लागून अश्या शाळेंत वचनाशिल्ल्या भुरग्यांच्या शिक्षणाचेर परिणाम जाता. हे खातीर गोंयांत येवपी कामगार कंत्राटदारां कडल्यान ताचे कडेन काम करपी कामगारांची भुरगीं शिकतात अशें बरोवन घेवप गरजेचें आसा. हे विशीं शिक्षण खात्यान कामगार आयिक्त कार्यालयाक लेखी कळयलां, अशें झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
