भांगरभूंय | प्रतिनिधी
पळून वचपाक मजत करपी ताब्यांत; कॉन्स्टेबल अमीत नायक सेवेंतल्यान बडतर्फ
भांगरभूंय । प्रतिनिधी
पणजीः गोंयांतल्या जमीन घोटाळ्यांतलो म्हाघोटाळेबाज सिद्दीकी उर्फ सुलेमान खानाक गुन्यांव फांट्याचे कोठडेंतल्यान पळून वचपाक मजत केल्लो पुलीस कॉन्स्टेबल अमीत नायक हाका गोंयांत हाडून सेवेंतल्यान बडतर्फ केलो. ते उपरांत सुलेमानाक हुबळींतल्यान मोटारींतल्यान पळून वचपाक मजत करपी दुबावीत हजरतसाब बवन्नवार उर्फ हजरत अली (34. रा. हुबळी) हाकाय गुन्यांव फांटो आनी पोरणें गोंय पुलीस पंगडान ताब्यांत घेतलो. ताका लागून सुलेमान हुबळींतल्यानूय पळून गेल्ल्याचें स्पश्ट जालां.
फाटल्या कांय म्हयन्यांत गोंयांत घडिल्ल्या जमीन हडप प्रकरणांत मास्टर मायंड आशिल्लो सिद्दीकी उर्फ सुलेमान खान हाणें कॉन्स्टेबल अमीत नायक हाचे मजतीन शुक्रारा फांतोडेर कोठडेंतल्यान फुज्ज्यो काडिल्ल्यो. हाचे वयल्यान विरोधकांनी सत्ताधाऱ्यांचेर आरोपांचो शिंवर करपाक सुरवात जाले उपरांत गोंय पुलिसांनी तत्काळ सुलेमान आनी अमीत नायक हाचो सोद घेवपाक सुरवात केली. ते प्रमाण गुन्यांव फांट्यान आनी गोंय पुलिसांनी शेजारच्या महाराष्ट्र आनी कर्नाटक पुलिशे कडेन संपर्क सादलो आनी चार पंगड कर्नाटकांत धाडले. सुलेमान हाका कोठडेंतल्यान पळून वचपाक मजत करपी कॉन्स्टेबल अमीत नायक शुक्रारा रातींच हुबळी पुलिशेक शरण आयिल्लो. ते उपरांत गोंय पुलिसांनी गोंयांत हाडले उपरांत नायक हाका पुलीस खात्यांतल्यान बडतर्फ केलो.
मजगतीं, पुलिसां कडल्यान अमीत नायक हाची चवकशी चालू आसतना, सुलेमानाक हुबळींतल्यान मोटारींतल्यान पळून वचपाक मजत करपी हजरतसाब बवन्नवार उर्फ हजरत अली हाकाय गुन्यांव फांटो आनी पोरणें गोंय पुलीस पंगडान ताब्यांत घेतला. ताका लागून सुलेमानूय हुबळींतल्यान पळून गेल्ल्याचें सिद्ध जालां. हजरत अली हाका गोंयांत हाडटले. ताची चवकशी केले उपरांत सुलेमान खंय गेला, हाची म्हायती पुलिशेक मेळटली.
असो अमीत सांपडलो सुलेमानाचे गरयेक
जमीन हडप प्रकरणांत सिद्दीकी उर्फ सुलेमान खानाक 12 नोव्हेंबराक हुबळी वाठारांत अटक केल्ली. त्या वेळार ताणें आपल्याक सोडचे खातीर पुलिसांक कोटींनी रुपया दिवपाचें हांयस दाखयल्लें, पूण पुलिसांनी ताच्या हांयसाक बळी पडनासतना ताका ताब्यांत घेवन गोंयांत हाडिल्लो. गुन्यांव फांट्याचे कोठडेंत आसतना सुलेमान वरिश्ठ अधिकाऱ्यांक पयशांचें हांयस दाखयत आसलो. ताच्या हांयसा कडेन हेरांनी फाट केले उपरांत कॉन्स्टेबल अमीत नायक ताचे गरयेक फारावलो.
सुलेमानाक कोठडेंतल्यान भायर काडून पळून वचपा आदीं अमीत नायकान दर दिसा रातच्या वेळार गार्डाची ड्युटी मागून घेतिल्ली. सुलेमान हो अमीताच्याच पोना वयल्यान आपल्या सांगात्यां कडेन संपर्क करतालो, अशें पुलीस तपासांतल्यान उक्तें जालां. सुलेमानान अमीताक ताचे घरकान्नी कडेन घटस्फोट घेवपाच्या प्रकरणांत तशेंच हेर मजतीची हमी दिवन कर्नाटकांत व्हरून सोडपाक सांगिल्लें. ते प्रमाणूच अमीतान ताका कोठडेंतल्यान काडून हुबली मेरेन पावयल्ल्याची म्हायती सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
