भांगरभूंय | प्रतिनिधी
डिसेंबर अर्दो सोंपलो. रोखडेंच नवें वर्स सुरू जातलें. अशे स्थितींत २०२४ वर्साच्या निमाण्या म्हयन्यांत संवसारांत एक दुर्मीळ खगोलीय घडणूक पळोवपाक मेळटली. १५ डिसेंबराक संवसाराक दिसपी चंद्राचें रूप ‘कोल्ड मून’ म्हणून वळखतात.
साधारणपणान कोल्ड मून वर्साक सगळ्यांत लांब रात म्हणल्यार २१ डिसेंबराक दिसता. नासाच्या म्हणण्या प्रमाण, ह्या वेळार आयतार, १५ डिसेंबराक फातोंडेर ४:०२ EST (भारतीय वेळे प्रमाण २:३२ वरांचेर) चंद्र पुराय शिखरार आसतलो. ही खगोलशास्त्रीय घडणूक पूर्वेक मळबांत उदेतना पळोवपाक शकतात.
डिसेंबरांतली पुनव ‘कोल्ड मून’ म्हणून वळखतात. ही एक खगोलीय घडणूक. जातूंत चंद्रीम सुमार ९९.५ टक्के वेळ दिसतलो. ‘कोल्ड मून’ हो शब्द अमेरिकन आनी युरोपियन घडणुकां वेल्यान आयला. कोल्ड मून, जाका ‘लॉंग नाईट मून’ अशेंय म्हणटात, डिसेंबरांत रातची लांबाय प्रतिबिंबीत करता. प्रत्यक्षांत डिसेंबरांत चडशे फावटीं रातचो सुमार १५ वरां काळोख आसता.
वृषभ राशींत स्थित, कोल्ड मून हो कांय तेजस्वी नकेत्रां आनी गुरू गिऱ्यान वेटाळिल्लो आसतलो. ‘स्टारगेझर्सां’ खातीर हें एक मोनेळ घालपी दृश्य आसतलें. अहवाला प्रमाण, मॅसॅच्युसेट्स, उत्तर कॅनडा, उत्तर- अस्तंत युरोप, ग्रीनलँड आनी आइसलँडाक रावपी लोक कोल्ड मून सहज पळोवपाक शकतात. कसल्याच उपकरणाची गरज नासता. मात जर तुमकां आनीक बरे तरेन पळोवपाक जाय जाल्यार तुमी दुर्बीण वा ल्हान दुर्बीणेचो वापर करपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
