भांगरभूंय | प्रतिनिधी
नवी दिल्ली : भाजपचे ज्येश्ठ फुडारी लालकृष्ण अडवाणी हांची भलायकी परत इबाडली. हाका लागून तांकां आयज दिल्लीच्या अपोलो हॉस्पिटलांत दाखल केल्या. मेळिल्ले म्हायती प्रमाण, सध्या तांची भलायकी थीर आसा.
लालकृष्ण अडवाणी हांची पिराय ९७ वर्सां. फाटल्या ४-५ म्हयन्यांत तांकां जायते फावट हॉस्पिटलांत दाखल करचें पडलें. ह्यान पयलीं ऑगस्ट म्हयन्यांत तांकां दाखल केल्ले. अडवाणी हे फाटल्या कांय काळा सावन भलायके विशींच्या समस्यां कडेन झुजताले. त्याच वर्सा तांकां देशाचो सर्वोच्च सन्मान भारतरत्नय दिलो. भलायकेच्या समस्यांक लागून ते राष्ट्रपती भवनांतले कार्यावळीक हजर रावपाक शकले नात. ताका लागून तांकां तांच्या घराच भारतरत्न भेटयलो. ८ नोव्हेंबराक प्रधानमंत्री नरेंद्र मोदी भाजपाचे ज्येश्ठ फुडारी लालकृष्ण अडवाणी हांकां वाडदिसाचीं परबीं भेटोवपाक तांच्या घरा पाविल्ले. मोदींनी सोशल मीडिया प्लॅटफॉर्म ‘एक्स’चेर एक फोटोय शेर केल्लो, जातूंत मोदी लालकृष्ण अडवाणींक फुलांचो तुरो भेटयतना दिसताले.
अडवाणी हांचो जल्म ८ नोव्हेंबर १९२७ दिसा कराचींत जालो. १९४२ वर्सा ते राष्ट्रीय स्वयंसेवक संघांत गेले. १९८६ ते १९९०, परत १९९३ ते १९९८ आनी २००४ ते २००५ ह्या काळांत ते भाजपाचे राष्ट्रीय अध्यक्ष आशिल्ले. अटलबिहारी वाजपेयी हांच्या सरकारांत ते गृहमंत्री आनी उपप्रधानमंत्रीय आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
