भांगरभूंय | प्रतिनिधी
पणजी : फाटल्या कांय वर्सांनी केंद्रा वतीन गोंयचे उदरगती खातीर निधीची पुरवण करता. राज्यांत केंद्राचे मजतीन विवीध मळार उदरगतीचीं कामां आनी प्रकल्प येतात. हेच फाटभूंयेर मडगांव बायपास ते कुंकळ्ळी मेरेनच्या ७.२५ किमी रस्त्या खातीर केंद्रान ७४७ कोटी मंजूर केल्यात. हातूंत ४.४५ किमी लांबायेचो स पदरी फ्लायओव्हराचोय आसपाव आसतलो. खासदार सदानंद शेट तानावडे हांणी प्रधानमंत्री नरेंद्र मोदी, अमित शहा आनी नितिन गडकरी हांचे उपकार मानले.
फाटींच राष्ट्रीय महामार्गाच्या बेंदोर्डे ते पोळे ह्या काणकोण बायपासाक जोडपी २२.१० किमी लांबायेच्या रस्त्याच्या चार लेनीं खातीर केंद्रान १,३७६ कोटी रुपया मंजूर केल्ले. ह्या रस्त्याचे चार लेनीक लागून काणकोण-कुंकळ्ळी आनी मडगांव मार्गांची जोडणी सुदारतली. केंद्रीय मंत्री नितीन गडकरी हांणी ट्विट करून हे विशींची म्हायती दिल्ली. बेंदोर्डे, कोर्डे आनी बार्शें वाठारांतल्या लोकांक चार लेनींच्या रस्त्याचो फायदो जातलो. ताका लागून ह्या वाठारांतल्या लोकांक कुंकळ्ळी वा मडगांव रोखडेच पावपाक मजत जातली.
सध्या काणकोणच्यान मडगांवां वा कुंकळ्ळी वचपाक बरोच वेळ लागता. ह्या चार पदरी रस्त्या उपरांत काणकोण ते कुंकळ्ळी वा काणकोण – मडगांवां वचपी येरादारी सुरळीत जातली. मडगांवच्यान कारवारा रस्त्यान खुबशे जाणा कर्नाटकांत वतात. कांय जाण कारवारच्यान गोंयच्या रस्त्यान महाराष्ट्रांतूय वतात. ह्या सगळ्यांक ह्या चार पदरी रस्त्याचो फायदो जातलो. काणकोण म्हालाचो पुराय दक्षीण गोंयां कडेन संपर्क सुदारपा खातीर हो प्रकल्प फायद्याक पडटलो, अशें केंद्रीय मंत्री गडकरी हांणी एक्सा (ट्विट) वरवीं म्हळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
