सुलेमानाच्यो बंदखणींतल्यान फुज्ज्यो

भांगरभूंय | प्रतिनिधी

जमीन हडप प्रकरणः मजत केल्लो कॉन्स्टेबल अमीत नायक हुबळींत शरण

भांगरभूंय | प्रतिनिधी

म्हापशें: जमीन हडप प्रकरणांतलो खांपो गुन्यांवकार सिद्दीकी उर्फ सुलेमान खान (54, रा. म्हापशें) हाणें गोंय गुन्यांव फांट्याचे बंदखणींतल्यान पळ काडलो. ताचे सुरक्षितताये खातीर आशिल्ल्या अमीत नायक ह्या आयआरबी पुलीस कॉन्स्टेबलाचे मजतीन पळ काडपाक सुलेमानाक येस आयलें. पुलिसांनी शुक्रारा सांजे उसरां अमीत नायक हाका हुबळींत ताब्यांत घेवन अटक केली. तो हुबळी पुलिसां कडेन शरण आयलो. दुबाविताक धरपा खातीर पुलिसांनी सोद मोहीम सुरू केल्या. ह्या प्रकरणा उपरांत गुन्यांव फांट्याचे सुरक्षा यंत्रणेचेर प्रस्न उप्रासला. दुबावितान पयलींच कट कारस्थान रचून पळ काडिल्ल्याचो अदमास पुलिसांनी उक्तायला.

मजगतीं, बंदखणींतल्यान पळ काडिल्लो सुलेमान खानाचो सोद घेवप सध्या सुरू जालां. गोंय पुलिसांनी शेजारच्या राज्यांतल्या पुलिसांकूय संपर्क केला. सुलेमानाक बंदखणींत विशेश वागणूक दिल्ल्याचे आरोप पुलिसांचेर केल्ले, ते पुलिसांनी न्हयकारल्यात.

ही घडणूक शुक्रारा फांतोडेर 2.30 ते 3 वरांच्या सुमाराक घडली. दुबावीत कॉन्स्टेबलान सुलेमान खानाक बंदखणींतल्यान भायर काडलो. ताचे उपरांत आपले मोटार सायकलीचेर बसोवन सुलेमाना वांगडा पळ काडलो. ताका सोदपाक पुलिशेचे चार पंगड कर्नाटकांत गेल्यात.

सुलेमान खान हाका 12 नोव्हेंबराक एसआयटीन हुबळीच्यान अटक केल्ली. फाटल्या चार वर्सां सावन तो फरारी आशिल्लो. दुबाविताचेर जमीन हडप, खून, खुनी हल्लो आनी फटवणूक अशें मेळून देशभरांत वट्ट 15 गुन्यांव नोंद आसात. गोंयांत 7, दिल्ली 1, हैदराबाद 4 आनी पुणे 3 अश्या गुन्यांवांचो आस्पाव आसा. एकतानगर म्हापशें- 1, गवळीमळ तिसवाडी- 3 आनी थिये 2 अश्यो वट्ट 6 मालमत्ता ताणें हडप केल्यात. म्हापशें, बेळगांव सारक्या सुवातांचेर दुबावितान जमीन विकत घेवप आनी विक्री करप हातूंत फटींगपणां केल्यांत.

सुलेमानाच्या नांवार 7 बँक खातीं आशिल्लीं. तातूंत किरकोळ रक्कम आशिल्ली. जाल्यार दुबावीत वापरतालो त्या एके बायलेच्या बँक खात्यांत 1.36 कोटी रुपया आशिल्ले. हें खातें ब्लॉक केलां. बायलां कडेन दुबावीत इश्टागत करतालो आनी तांकां विस्वासांत घेवन, तांचें बँक खातें वापरून, ताचे वरवीं अर्थीक वेव्हार करतालो. गोंयां सयत दिल्ली, हैदराबाद, हुबळी, धारवाड, पुणे वाठारांतल्या वट्ट 35 बायलांची तांणी गुन्यांव करपाक मजत घेतल्या. ह्या सगळ्या बायलां सयत ताच्या हेर वांगड्यांची चवकशी करून उपरांत फुडली कारवाय जातली. दुबाविता कडेन बोगस ड्रायव्हींग लायसन्स आनी पेन कार्ड सांपडलां. हीं कागदपत्रां ताणें खंयच्यान मेळयल्यांत, हाचो तपास सुरू आसा, अशें गुप्ता हांणी सांगलें.

दुबाविताचे पालक मूळचे शिमोगा कर्नाटकाचे. ताचो जल्म म्हापश्यां जालो. सुरवातेक तो गवंडेंकाम करतालो. उपरांत कंत्राटदार आनी ताचे उपरांत प्रॉपर्टी डिलर जालो. बनावट मुखत्यारपत्र करून मालमत्ता विक्रीपत्र करतालो. एकूच जमीन वेगवेगळ्यांक विकप, अशीं फटींगपणां तो करतालो.
हणजूणच्या लुईझा आनी तेरशेला फर्नांडीस हांचे वांगडा दुबावितान मालमत्ता विक्रीचो 77 लाखांचो वेव्हार केल्लो. ताका लागून तांणी 12 लाख रुपया रक्कम पयलींच दिल्ली. ह्या वेव्हारांत फटवल्ल्यान त्या दोगांयचेर खुनी हल्लो केल्लो. हातूंत लुईझा हिका मरण आयिल्लें.

म्हापशेंचे अॅड. ज्ञानेश्वर कळंगुटकार हांचेरूय ताणें विखारी इंजेक्शन हल्लो केल्लो. कळंगुटकार 40 लाख रुपया परत करिनाशिल्ल्यान ताचेर हल्लो केल्लो, असो दावो पुलीस चवकशे वेळार दुबावितान केलो.

2-18 त हैदराबादाक आदल्यो नोटी बदलपाच्या वेव्हारांत पुलिसांनी ताका अटक केल्ली. कांय प्रकरणांत अटक करची न्हय म्हणून दुबावितान सर्वोच्च न्यायालयाच्या वकिलां कडेन संपर्क केल्लो. 2004 सावन दुबाविताचो बनावटगिरी आनी फटींगपणाच्या गुन्यांवांत आस्पाव आसा.

पुलीस कोठडेंतल्यान पळून गेल्लो सिद्दीकी उर्फ सुलेमान खान प्रकरणांत गुन्यांव नोंद केला. दुबावीत पुलीस कॉन्स्टेबल तशेंच हेर कर्मचाऱ्यां कडल्यान घाळपणां जाल्लीं आसात जाल्यार चवकशे उपरांत खर कारवाय जातली.

• वर्षा शर्मा, डीआयजी