भांगरभूंय | प्रतिनिधी
पणजी: पणजे शारांत १५ डिसेंबरा सावन सुरू जावपी सरेंडीपिटी कला महोत्सवा वांगडा ‘स्मार्ट सिटी’ डेकोरेट केल्ल्या ‘प्रावड पणजीकर मल्टीमीडिया इव्हेंटा’ची सुरवात जातली. हे कार्यावळीचें मुखेल आकर्शण आसतलें, ब्रॉडवेचे नाट्यलेखक नील सायमन हांचें ‘द सिडक्शन’ हें विनोदी लघु नाट्य. तें ज्ञानेश मोघे हांणी दिग्दर्शीत केलां. सलील नायक, अमांडा रॉड्रीगीज आनी अफ्ताब फारुकी हांणी तातूंत भुमिका केल्यात.
४० मिनटांचें हें इंग्लीश लघुनाट्य प्रेक्षकांच्या मुखामळार हांसो हाडपी आसतलें. आदल्या पाटो पुला कुशीक आशिल्ल्या नूतनीकरण केल्ले (आदलें भौशीक बांदकाम खातें) इमारतींत १५, १६, १९, २१ आनी २२ डिसेंबर अशें पांच दीस, सांजेवेळार ७ वरांचेर ह्या लघुनाट्याचे प्रयोग सादर जातले. हे प्रयोग सगळ्यां खातीर उक्ते आसतले.
‘प्रावड पणजीकर मल्टीमीडिया इव्हेंट’त १५ ते २२ डिसेंबर मेरेन चलपी कार्यावळींत नाच, आवाज- दृश्य माध्यम, सायलेंट डिस्को आनी योग ह्या कार्यावळींचोय आसपाव आसा. सद्दां सकाळचीं ८ ते सांजेवेळार मेरेन ह्यो कार्यावळी चालूच आसतल्यो. हो उत्सव पणजे चलपी सेरेंडीपीटी आर्ट फेस्टिवलाचोच एक वाटो जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
