भांगरभूंय | प्रतिनिधी
आयआरबी पुलीस कॉन्स्टेबल अमित नायकाची घेतली मजत
म्हापशें ः जमीन हडप प्रकरणांतल्या खांपो गुन्यांवकार सिद्धीकी उर्फ सुलेमान खान (५४, रा. म्हापशें) हाणें गोंय गुन्यांव फांट्याचे बंदखणींतल्यान पळ काडलो. ताचे सुरक्षीतताये खातीर आशिल्ल्या अमित नायक ह्या आयआरबी पुलीस कॉन्स्टेबलाचे मजतीन पळ काडपाक सुलेमानाक येस आयलें. दुबाविताक धरपा खातीर पुलिसांनी सोद मोहीम सुरू. ह्या प्रकरणा उपरांत गुन्यांव फांट्याचे सुरक्षा यंत्रणेचेर प्रस्न उप्रासला. दुबावितान पयलींच कट कारस्थान रचून पळ काडिल्ल्याचो अदमास पुलिसांनी उक्तायला.
मजगतीं, बंदखणींतल्यान पळ काडिल्लो सुलेमान खान आनी पुलीस कॉन्स्टेबल अमित नायकाचो सोद घेवप सध्या सुरू जालां. गोंय पुलिसांनी शेजारच्या राज्यांतल्या पुलिसांकूय संपर्क केला. सुलेमानाक बंदखणींत विशेश वागणूक दिल्ल्याचे आरोप पुलिसांचेर केल्ले. ते पुलिसांनी न्हयकारल्यात.
ही घडणूक शुक्रारा फांतोडेर २.३० ते ३ च्या सुमाराक घडली. दुबावीत कॉन्स्टेबलान सुलेमान खानाक बंदखणींतल्यान भायर काडलो. ताचे उपरांत आपले मोटार सायकलीचेर बसोवन सुलेमाना वांगडा पळ काडलो. सध्या हे दोगूय खंयचे दिकेन गेल्यात हाचो सोद पुलीस घेतात.
सुलेमान खान हाका १२ नोव्हेंबराक एसआयटीन हुबळीच्यान अटक केल्ली. फाटल्या चार वर्सां सावन तो फरारी आशिल्लो. दुबाविताचेर जमीन हडप, खून, खुनी हल्लो आनी फटवणूक अशें मेळून देशभरात वट्ट १५ गुन्यांव नोंद आसात. गोंयांत ७, दिल्ली १, हैदराबाद ४ आनी पुणे ३ अश्या गुन्यांवांचो आसपाव आसा. एकतानगर म्हापशें- १, गवळीमळ तिसवाडी- ३ आनी थिये २ अश्यो वट्ट स मालमत्ता ताणें हडप केल्यात. म्हापशें, बेळगांव सारक्या सुवातांचेर दुबावितान जमीन विकत घेवप आनी विक्री करप हातूंत फटींगपणां केल्यां.
सुलेमानाच्या नांवार सात बँक खातीं आशिल्लीं. तातूंत किरकोळ रक्कम आशिल्ली. जाल्यार दुबावीत वापरतालो त्या एके बायलेच्या बँक खात्यांत १.३६ कोटी रूपया आशिल्ले. हें खातें ब्लॉक केलां. दुबावीत बायलां कडेन इश्टागत करतालो आनी तांकां विस्वासांत घेवन, तांचें बँक खातें वापरून, ताचे वरवीं अर्थीक वेव्हार करतालो. गोंयां सयत दिल्ली, हैदराबाद, हुबळी, धारवाड, पुणे वाठारांतल्या वट्ट ३५ बायलांची तांणी गुन्यांव करपाक मजत घेतल्या. ह्या सगळ्या बायलां सयत ताच्या हेर वांगड्यांची चवकशी करून उपरांत फुडली कारवाय जातली. दुबाविता कडेन बोगस ड्रायव्हींक लायसन्स आनी पेन कार्ड सांपडलां. हीं कागदपत्रां ताणें खंयच्यान मेळयल्यांत, हाचो तपास सुरू आसा, अशें गुप्ता हांणी सांगलें.
दुबाविताचे पालक मूळचे शिमोगा कर्नाटकाचे. ताचो जल्म म्हापश्यां जालो. सुरवातेक तो गवंडेंकाम करतालो. उपरांत कंत्राटदार आनी ताचे उपरांत प्राॅपर्टी डिलर जालो. बनावट मुखत्यारपत्र करून मालमत्ता विक्रीपत्र करतालो. एकूच जमीन वेगवेगळ्यांक विकप, अशीं फटींगपणां तो करतालो.
हणजूणच्या लुईझा आनी तेरशेला फर्नांडीस हांचे वांगडा दुबावितान मालमत्ता विक्रीचो ७७ लाखांचो वेव्हार केल्लो. ताका लागून तांणी १२ लाख रूपया रक्कम पयलींच दिल्ली. ह्या वेव्हारांत फटवल्ल्यान त्या दोगांयचेर खुनी हल्लो केल्लो. हातूंत लुईझा हिका मरण आयिल्लें.
म्हापशेंचे अॅड. ज्ञानेश्वर कळंगुटकार हांचेरूय ताणें विखारी इंजेक्शन हल्लो केल्लो. कळंगुटकार ४० लाख रूपया परत करिनाशिल्ल्यान ताचेर हल्लो केल्लो, असो दावो पुलीस चवकशे वेळार दुबावितान केलो.
२०१८ त हैदराबादाक आदल्यो नोटी बदलपाच्या वेव्हारांत पुलिसांनी ताका अटक केल्ली. कांय प्रकरणांत अटक करची न्हय म्हणून दुबावितान सर्वोच्च न्यायालयाच्या वकिलां कडेन संपर्क केल्लो. २००४ सावन दुबाविताचो बनावटगिरी आनी फटींगपणाच्या गुन्यांवांत आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
