भांगरभूंय | प्रतिनिधी
फाटल्या धा वर्सांत देशभरांत जाल्ल्या अपघातांत 15 लाख 30 हजारां परस चड नागरिकांक मरण आयिल्ल्याची आंकडेवारी मुखार आयल्या. केंद्रीय रस्तो मंत्रालयान ही आंकडेवारी हालींच जाहीर केल्या. केंद्रीय रस्तो मंत्रालयाच्या संकेत थळार ही आंकडेवारी उपलब्ध आसून ते प्रमाण 2013 ते 2023 ह्या धा वर्सांत रस्तो अपघातांत बळी पडिल्ल्यांचे संख्येंत पयल्या स्थानार उत्तर प्रदेश, दुसऱ्या स्थानार तामीळनाडू जाल्यार तिसऱ्या स्थानार महाराष्ट्र ह्या राज्यांचो आस्पाव आसा.
गोंयांत तर दीसपट्टे अपघात जायत आसतात. तातूंत मरण येवप्यांचो आंकडो लेगीत सुमारा भायर वाडूंक लागला. ही हुस्क्याची गजाल. रस्तो अपघात जावपाची कारणां म्हळ्यार नेमांक पाळो दिवप ना. हलगर्जीपणान वाहन चलोवप. दुचाकी चलोवपी चडशे हॅल्मॅट घालिनात. सोरो पियेवन वाहनां चलोवप. गतीचेर नियंत्रण ना. मोबायलाचेर उलयत वाहन चलोवप हें सारकीं खूबशीं कारणां दिवं येतात. लोकांनी रस्तो नेमांक पाळो दीत जाल्यार अपघातांची संख्या उणी जावं येता. हालिंसरा नेण्टी भुरगींय वाहनां चलयतना दिश्टी पडटात, आनी अपघाताक कारण थारतात. गोंयांत नेण्ट्यां भुरग्यांचे अपघात वाडत आसात. पालकांनी तांकां वाहन दितना सादुरताय बाळगुची. हायस्कुलांनी, कॉलेजींनी वतना पालक तांकां वाहनां दितात. भुरगींय कशाय कशीं वाहनां चलोवन आपले बरोबर दुसऱ्यांकूय त्रासांत घालपाचे प्रकार हालीं खूब वाडल्यात. विद्यार्थ्यांक तांच्या हायस्कुलांनी वचून येरादारी पुलीस मार्गदर्शन करतात. तांकां नेम, कायदो हाचे विशीं सविस्तर म्हायती दितात. पूण ताका ते पाळो दितात व्हय? हो संशोधनाचो विशय थारला.
रस्तो अपघातांत जर इतल्या लोकांक दर वर्सा मरण येता आसत जाल्यार ही हुस्क्याची गजाल. विशेश म्हणल्यार हातूंतलीं चडशीं मरणां 20 ते 50 ह्या पिराये गटांतलीं आसात. हाचोच अर्थ रस्तो अपघातांत सगल्यांत चड मरण हें तरणाट्यांचें जायत आसता. ज्या तरणाट्यां कडेन देशाचो आधारस्तंभ म्हूण पळयतात त्याच तरणाट्यांक जर मरण येता आसत जाल्यार देशाचें हें व्हड लुकसाण. फक्त सर्वसामान्य तरणाटेच न्हय जाल्यार देशांतले खूबशे महनीय मनशांक लेगीत रस्तो अपघातांत मरण आयलां.
दोन वर्सां पयलीं शिवसंग्राम पक्षाचे संस्थापक अध्यक्ष आनी मराठा समाजाचे फुडारी विनायक मेटे हांकां अपघाती मरण आयलें. तांच्या मरणान मराठा समाजाचेंच न्हय जाल्यार राज्याचें तशेंच देशाचें व्हड लुकसाण जालें. टाटा समुहाचे आदले अध्यक्ष आनी नामनेचे उद्देगपती सायरस मिस्त्री हांकां अपघाती मरण आयलें. सायरस मिस्त्री हांकां गुजरातच्या अहमदाबाद सावन मुंबय वचपी मार्गार चारोटी कुशीक सुर्या न्हंयच्या पुलार अपघात जालो. सायर मिस्त्री हांचे देशाच्या उद्देगीक विकासांत म्हत्वाचें योगदान आसा. तांच्या मरणान उद्देग मळार व्हड दुख्खाची सया पातळिल्ली. सायरस मिस्त्री, विनायक मेटे हांचे सारक्या समाजांतल्या महनीय व्यक्तींच्या अशा अकाली मरणान समाजाचें व्हड लुकसाण जायत आसता.
विनायक मेटे, सायरस मिस्त्री हे समाजांतले व्हड मनीस म्हणून तांच्या मरणाची खबर आयली. अशे कितलेशेच रस्तो अपघात जावन दर वर्सा लाखांनी लोकांक मरण येता. देशांत सगल्यांत चड मरण रस्तो अपघातांत जाता. अपघातांत जखमी आनी कायमचो अपंगूळ जावपाची संख्या तर सुमारा भायर आसा. विशेश म्हणल्यार हातूंत तरणाट्यांचो आस्पाव चड आसा. ज्या तरणाट्यांच्या बळार आमी महासत्ता जावपाचें सपन पळयत आसात त्याच तरणाट्यांक अपघातांत मरण येत आसलें जाल्यार देशाचें हें व्हड लुकसाण.
खूबशे यत्न करून देशांतले रस्तो अपघातांची संख्या उणी कित्याक जायना हो एक संशोधनाचो विशय आसा. वाडट्या रस्तो अपघातांनी जितली वेवस्था जापसालदार आसा तितलीच मनशाच्यो चुकोय जापसालदार आसात. टोलाच्या माध्यमांतल्यान कोट्यांनी रुपयांची वसुली करीत आसतनाच म्हामार्गार जिवघेण्या ब्लॅकस्पॉटांत सुदारणा जायना. तेच प्रमाण रस्त्या वेलीं फोंडकुलां, धुल्लाचे साम्राज्य, म्हामार्गा वेलीं अतिक्रमणां, सर्व्हीस रोडांचो उणाव, रस्त्यार उबीं केल्लीं अवजड वाहनां, बंद पडिल्ल्या वाहनां खातीर उणीं पडत आशिल्लीं मजत केंद्रां, हेडगीं जनावरां, उणे दुभाजक ह्यो गजाली अपघाता खातीर कारण थारत आसात.
म्हामार्गार वाहन चालक गतीचे मर्यादेक पाळो दिनात. चडशे प्रवाशी 100 किमि परस चड गतीन वाहन चलयतात. ट्रक आनी हेर व्हड वाहनां कडल्यान लेनीचे शिस्तीक पाळो दिनात. कांय वाहन चालक जाल्यार सोरो पियेवन वाहन चलयतात, जाल्यार कांय वाहन चालक वाहन चलयत आसतनाच मोबायलाचेर उलयतात. वाहनांची वेवस्थीत निगा न राखप, सीट बेल्ट न घालप ह्यो गजाली अपघाताक कारण थारतात. नेम खबर आसून लेगीत चालक तांकां पाळो दिनात. सगल्यांकूच उण्या वेळांत आपल्या ठिकाणार पावपाची ताकतीत आसता. नेमांक पाळो दिलोच म्हणून अपघातांचो आंकडो उणो जायना. अपघातांचो आंकडो उणो जावपाचो आसत जाल्यार वाहन चालकांनी नेमांक पाळो दिवचोच पडटलो. नेम पाळात अपघात टाळात.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
