भांगरभूंय | प्रतिनिधी
कला अकादमीच्या ‘ब’ गट मराठी नाट्य सर्तींत पयलें इनाम फावो जाल्ल्या कारापूर- तिस्क सांखळेच्या विठ्ठल मंच सांगाती संस्थेन प्रस्तुत केल्लें, मिलिंद बर्वे लिखीत आनी नितीन शिवराम नायक दिग्दर्शीत ‘देवा म्हाराजा’ ह्या नाटकांत काम करप म्हणल्यार नवें कितें तरी शिकपाक मेळ्ळें. नितीन नायक हांणी पावला-पावलाक म्हाका केल्लें मार्गदर्शन म्हजी सकारात्मकताय आनी उर्बा वाडयताली, कलाकार वयान कितलोय जाण्टो जांव, पूण कला सदांच तरूण उरता हाची जाणविकाय ह्या नाटकांतल्यान जाली. खरें म्हणल्यार लग्ना उपरांत हांव परत केन्ना रंगमाचयेर पावल दवरतलें हें चितूंकच नासलें. नितीन म्हजो इश्ट. म्हज्या चल्याक पार्थाक तो नाटक, अभिनय ह्या मळार खूब मार्गदर्शन करता. ताणें दिग्दर्शीत केल्लें, सिद्धांत खांडेकार लिखित ‘मृत आत्मा’ ह्मा नाटकांत पार्थान आत्मा – 1 ची भूमिका केल्ली. त्या नाटकाक ‘ब’ गट सर्तींत पोरूं चवथें इनाम मेळिल्लें. दिग्दर्शक म्हणून नितीना भितर भरपूर क्षमता आसा आनी हातांत घेतिल्ले संहितेचें भांगर करपाचें कसब ताच्यांत आसा हाची म्हाका जाणविकाय आसली.
अंदू ‘देवा म्हाराजा’ सर्तीक घालपाची तयारी केल्या, कास्टींग चालू आसा हाची कल्पना नितीनान म्हाका दिली. ‘हेर सगळीं पात्रां फायनल जालीं पूण ‘प्रवाहीत’ ह्या पात्रांक आपल्याक फावो अशी बायल कलाकार मेळना गो’ अशें उलयतां उलयतां एक दीस सहज नितीनान म्हाका सांगलें. ताका मदत करपाक हावेंय सोदपाक सुरवात केली. नाटकाच्या संहिते विशीं म्हाका कांयच खबर नासलें. कितल्याशाच बायल कलाकारांचें आॅडिशन नितीनान घेतलें, एक- दोग जाणांक फायनल केलींय बी पूण कितें तरी अडचण येवन तीं फाटीं सरलीं. निमणें नितीनाच्या मनांत कितें आयलें कोण जाणां आनी एक दीस अचकीत ताणें म्हाका मेसेज केली. ‘प्रवाहीत तूं कर’ हांव मेसेज वाचून चितूंक पडलें. वीस वर्सांचो गॅप, मराठी नाटक, तेंय बी स्पर्धेचें…. म्हजे कडेन जातलें? आनी स्टेजीर हावें गडबड केली आनी म्हाका लागून हांचें नाटक फेल गेलें जाल्यार?? घरा कडेन मांयक आनी घोवा कडेन हांव उलयलें. तांणी म्हाका आत्मविश्वास दिलो आनी सर फुडें म्हणलें. म्हजो पूत पार्थ, ताचो तेंको तर आसलोच. परत हांवें नितीनाक फोन केलो आनी म्हजो भंय ताचे कडेन मांडलो. ताणें म्हजी उर्बा वाडयली आनी म्हणलें ‘आपूण तुजे कडल्यान करून घेतां. तूं कांयच भियेंव नाका.’ नाटकाची संहिता हावें वाचली आनी निश्चितच ह्या नाटकांत कितें तरी वेगळें आसा हाची जाणविकाय म्हाका जाली आनी सुरू जालो म्हजो ‘देवा म्हाराजा’ चो प्रवास.
तालमीचो दरेक दीस आमकां नवें कितें तरी दिवन वतालो, नाटकाचे पुराय प्रक्रियेची आमी सगल्यांनी मजा घेतली. लेखक मिलिंद बर्वे हांचेय मार्गदर्शन तालमी वेळार मेळटालें. नेपथ्यकार सतीश गांवकार हांचीय तालमी वेळार उपस्थिती नाटक समजूपाक मदत करपी थारली. नाटकांतलें संगीत, गितां तोंडार घोळटालीं तेन्ना तालमीचो पुराय शीण नाच्च जातालो. दरेक सहकलाकार एकामेकांक सांबाळून घेतालो. एकूणच हांसत खेळत, एकामेकांक साथ दित ‘देवा म्हाराजा’ उबें जालें आनी पुराय ताकदीन आमी तें प्रेक्षकां मुखार सादर केलें…. आनी प्रेक्षकां कडल्यान आयिल्ल्या प्रतिसादान नवें कितें तरी केल्ल्याचें समाधान मेळ्ळें.
म्हाका ह्या नाटकांत संद दिल्ले खातीर विठ्ठल मंच सांगाती आनी दिग्दर्शक नितीन शिवराम नायक हांचें उपकारी. परत रंगमाचयेची सेवा करपाचें समाधान आनी ‘देवा म्हाराजा’क मेळिल्ल्या यशाची खोशी सदांकाळ यादींत उरतली. पुराय ‘देवा म्हाराजा’ टीमीक, विठ्ठल मंच सांगातीच्या वांगड्यांक खूब खूब मोग.
राधिका कामत सातोस्कार
9823674520
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
