भांगरभूंय | प्रतिनिधी
संवसारीक बुद्दीबळ वस्तादपण सर्तः उणे पिरायेचेर किताब जिखपी संवसारांतलो पयलो ग्रॅण्डमास्टर
खबरां संस्था
सिंगापूरः भारताचो 18 वर्सां पिरायेचो ग्रॅण्डमास्टर डी गुकेशान सिंगापूरांत चालू आशिल्ली संवसारीक बुद्दीबळ वस्तादपण सर्त जिखली. ताणें सध्याचो वस्ताद चीनाच्या डींग लिरेनाक 7.5-6.5 अशा गुणां फरकांनी हारयलो.
उण्या पिरायेचेर संवसारीक बुद्दीबळ वस्तादपण सर्त जिखपी तो संवसारांतलो पयलो खेळगडो थारलो. ताणें रशियेचो आदलो म्हान ग्रॅण्डमास्टर गॅरी कास्पारोव्हाचो विक्रम मोडलो. कास्पारोव्हान 1985त 22 वर्सां पिरायेचेर ही सर्त जिखिल्ली.
गुकेशान पोरूं कॅण्डिडेट्स सर्त जिखून संवसारीक बुद्दीबळ वस्तादपण सर्तीची पात्रताय मेळयिल्ली. ताणें कॅण्डिडेट्स सर्त 17 वर्सां पिरायेचेर जिखिल्ली. ती सर्त जिखपी तो संवसारांतलो सगल्यांत उण्या पिरायेचो खेळगडो थारिल्लो.
गुकेशान 14व्या डावांत हारोवन वस्तादपण जोडलें. 25 नोव्हेंबराक सर्त सुरू जाल्ली. पयलो डाव लिरेना जिखिल्लो, जाल्यार गुकेशान तिसरो डाव जिखून बरोबरी सादिल्ली. ते उपरांत सेगीत सात डाव बादाबाद उरिल्ले. अखेरेक ही कोंयडी गुकेशान फोडली. 12वो डाव जिखून ताणें आघाडी घेतिल्ली. पूण, लिरेनान 13वो डाव जिखून बरोबरी सादिल्ली.
138 च्या इतिहासांत पयले खेपे दोन आशियायी खेळगड्या मदीं जाली सर्त
इंटरनेशनल चेस फेडरेशनाच्या (फिडे) 138 वर्सांच्या इतिहासांत पयलेच खेपे दोन आशियायी खेळगड्यां मदीं वस्तादपणा खातीर लडत जाली. गुकेशाक ह्या जैतान 20.86 कोटी रुपया मेळटले.
डी गुकेश कोण?
डी गुकेशाचें पुराय नांव डोमराजू गुकेश. तो चेन्नय रावता. ताचो जल्म 7 मे 2006 ह्या दिसा चेन्नयंत जालो. पिरायेच्या 7 व्या वर्सां सावन ताणें बुद्दीबळ खेळपाक सुरवात केली. ताका सुरवेक भास्कर नागय्या हाणें प्रशिक्षण दिलें. गुकेशाचो बापूय दोतार जाल्यार आवय वेवसायान मायक्रोबायोलॉजिस्ट आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
