भांगरभूंय | प्रतिनिधी
शिरोडेंच्या पालकांची शिटकावणीः शिक्षिकेचे बदलेचेर ठाम
भांगरभूंय । प्रतिनिधी
फोंडें: तारीवाडो- शिरोडेंच्या सरकारी मुळावे शाळेंतल्यान 18 विद्यार्थ्यां सयत पालकांनी बुधवारा धरणें आंदोलनाक सुरवात केली. नव्यान नेमिल्ले शिक्षिकेची बदली करपाचे मागणेचेर पालक ठाम आसा. शिक्षिकेची बदला जाहीर जाय मेरेन विद्यार्थ्यांक शाळेंत धाडचे नात, अशी शिटकावणी पालकांनी दिल्या. तशेंच नेमिल्ले वंदना पाटील नायक हे शिक्षिकेन विद्यालयांत सुरू जाल्ल्या पयल्या दिसा सावन आपली मानसीक सतावणूक सुरू केल्या अशी कागाळ पालकांनी शिक्षण खात्याच्या अधिकाऱ्यां कडेन केल्या. शिक्षण खात्यान बुधवारा बुधवारा दनपारां वंदना पाटील नायक हांची शिरोडें वाठारांतले एके सरकारी मुळावे शाळेंत बदली करपाचो आदेश दिला.
शिक्षण खात्याच्या अधिकाऱ्यांनी शालेंत सप्टेंबरा सावन नेमिल्ली शिक्षिका भुरग्यांक वेवस्थीत शिकयना, हे खातीर पालकांनी हे आदींच विवीध खात्यां कडेन तिची बदली करची हे खातीर निवेदनां दिल्लीं. शिक्षिकेची बदली करूंक नाशिल्ल्यान मंगळारा पालकांनी भुरग्यांक शाळेंत धाडूंक नाशिल्लीं. तशेंच पालकांनी फोंडें भाग शिक्षण अधिकाऱ्यांची बेट घेवन ते शिक्षिकेची बदली करची म्हूण परतून निवेदन दिलां. पूण बुधवारा सकाळीं विद्यार्थ्यां सयत पालकांनी शाळे भायर धरणें आंदोलनाक सुरवात केली. शिक्षण खात्याचे अधिकारी जे मेरेन ते शिक्षिकेचे बदलेचो आदेश जाहीर करिनात, ते मेरेन विद्यार्थ्यांक शाळेंत धाडचे नात, अशी तांणी शिटकावणी दिल्या.
सुदाम नायक ह्या पालकान हे संबंदांत अदीक म्हायती दितना सांगलें, वंदना पाटील नायक हे शिक्षिकेचें विद्यार्थ्यांचेर लक्ष ना. राजकी चेपण वापरून तिणें हे शाळेंत स्वताची नेमणूक करून घेतल्या. पयल्या दिसा सावन भुरगीं आपल्या पालकां कडेन ते शिक्षिकेच्यो कागाळी करतात. भुरग्यांचो फुडार धोक्यांत आसा. ह संबंदांत शिक्षण खात्या कडेन कागाली केल्यात, पूण अजून मेरेन तिची बदली करपाच्यो हालचाली जावंक नात. हे खातीर भुरग्यांक घराच दवरपाचो पालकांनी निर्णय घेतला. जे मेरेन ते शिक्षिकेची बदली करिनात ते मेरेन भुरग्यांक घराच दवरतले, अशें तांणी सांगलें.
लक्ष्मण तारी हांणी सांगलें, शिक्षिका वंदना पाटील नायक शाळेंत येत सावन भुरग्यांच्या अभ्यासाचेर वायट परिणाम जाला. भुरग्यांक बरें शिक्षण दिवपा बदला, ती आपल्याच संवसारांत वावुरता. भुरग्यांच्या शिक्षणाचेर परिणाम जावचो न्हय हे खातीर पालकांनी तिची बदली जाय मेरेन भुरग्यांक घराच दवरपाचो निर्णय घेतला.
पालकांनी मानसीक सतावणूक चलयल्याः शिक्षिका
पयल्या दिसा सावन पालकांनी आपली मानसीक सतावणूक चलयल्या. सद्दां सकाळीं भुरग्यांक घेवन येवपी पालक आपल्याक थोमणें मारीत आसतात. पालकांचे वागणुके विशीं खात्याच्या वरिश्ठ अधिकाऱ्यां कडेन कागाळ केल्ली. फाटलीं 23 वर्सां आपूण नोकरी करता, पूण हे शाळेंत रुजू जायत सावन कसलेंच कारण नासतना पालक आपल्याक शाळेंत येव नाका, अश्यो धमकी दितात, अशें शिक्षिका वंदना पाटील नायक हांणी सांगलें.
विद्यार्थ्यां कडल्यान सकारात्मक अहवाल
पालकांचे कागाळे उपरांत दोन खेपे अधिकाऱ्यांक शाळेंत धाडिल्ले. पूण दोनूय खेपे शिक्षिका वंदना पाटील नायक बरें शिक्षण दिता, असो अहवाल विद्यार्थ्यां कडल्यान मेळ्ळा, अशें शिक्षण खात्याचे सहाय्यक संचालक डॉ. उदय गांवकार हांणी सांगलें.
तारीवाड्या वयलेच शाळेंत शिक्षिके आड कागाळ !
शिक्षिका वंदना पाटील नायक हिचे आड पालकांनी कागाळ केले उपरांत खात्याचे वरिश्ठ अधिकारी शाळेंत आयिल्ले. त्या दिसा ती शिक्षिका रजेर आशिल्ली. त्या दिसा पालकांकूय शाळेंत आपयल्ले, पूण एकूय पालक त्या दिसा शाळेंत येवंक ना. फाटल्या 23 वर्सांत वंदना पाटील नायक हांणी साबार शाळांनी शिकयलें, पूण तारीवाड्या वयले शाळेंत बदली जाले उपरांत मात तिचे आड कागाळी कित्याक दाखल जाल्यो, असो प्रस्न खात्याच्या अधिकाऱ्यांक पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
