भांगरभूंय | प्रतिनिधी
पणजी: 2023-23 चे तुळेन 2023-24 त गोंयांत आयिल्ल्या देशी पर्यटकां प्रमाणूच विदेशी पर्यटकांतूय व्हड प्रमाणांत वाड जाल्ल्याचें राज्यसभा खासदार सदानंद शेट तानावटडे हांणी राज्यसभेंत विचारिल्ल्या लेखी प्रस्नाक केंद्रीय नागरी विमान उड्डाण राज्यमंत्री मुरलीधर मोहोळ हांणी दिल्ले जापेंतल्यान मुखार आयलां.
देशभरा सयत गोंयांतूय कोविडाचो उद्रेक उरिल्ल्या 2020-21 आनी 2021-22 ह्या दोन वर्सांत गोंयांत आयिल्ल्या विदेशी पर्यटकां मदीं उणाव जाल्लो. 2022-23 त विदेशी पर्यटकां मदीं वाड जाली. ह्या वर्सा गोंयांत 4,67,410 विदेशी पर्यटकांनी भेट दिल्ली. पूण फाटल्या वर्सा म्हणल्यार 2023-24 त दाबोळी विमानतळार 4,27,089 आनी मोपा विमानतळार 1,15,288 अशे मेळून 5,42,377 विदेशी पर्यटकांची नोंद जाल्ल्याचें मंत्री मोहोळ हांणी जापेंतल्यान दिल्ले आंकडेवारींतल्यान दिसून येता. जाल्यार 2022-23 त दाबोळी आनी मोपा ह्या दोनूय विमानतळांचेर 85,56,153 देशी पर्यटकांची नोंद जाल्ली. 2023-24 त ह्या दोनूय विमानतळांचेर 1,07,36,121 देशी पर्यटकांची नोंद जाल्ल्याचें मुखार येता.
मजगतीं, कोवीड काळांत गोंयांत येवपी विदेशी पर्यटकां मदीं व्हड प्रमाणांत उणाव जाल्लो. ताचो फटको राज्याचें पर्यटन आनी ताचेर आदारीत वेवसायांक बशिल्लो. पूण कोवीड काळ सोंपले उपरांत विदेशी पर्यटकांचो गोंयां कडली ओड वाडिल्ल्याचें आंकडेवारी वेल्यान दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
