भांगरभूंय | प्रतिनिधी
लो कसभेचे वेंचणुकेंत एकामतान केंद्रांतल्या सत्तारूढ भारतीय
जनता पक्षा कडेन लडपी विरोधी पक्षांच्या इंडी आघाडींत
बदलत्या काळा प्रमाण जी फूट पडत चल्ल्या आनी दीसपट्टी ही फूट जे तरेन अदीकच रुंद जायत चल्ल्या ती पळयतकच येता त्या कांय दिसांनी विरोधी आघाडीचें अस्तित्व उरतलेंच अशें सांगूंक येवचें ना. आतां तातूंतच अस्तंत बंगालच्यो मुख्यमंत्री आनी तृणमूल काँग्रेसीच्यो सर्वेसर्वा ममता बॅनर्जी हांणी ‘इंडी’ आघाडीच्या फुडारपणाचेर अप्रत्यक्ष काय जायना विधानसभा वेंचणुकेंत आघाडीक आयिल्ल्या अपेसाचें एक तरेन खापर फोडलां, आनी तातूंतल्यानूच चडशे करून आघाडीत अजून खूबशी बिघाडी जावपाची शक्यताय दिसूंक लागल्यांत. ममतादिनींन विरोधी आघाडीचें फुडारपण आपूण बंगालांतल्यान करपाक तयार आसा असें सांगून काँग्रेसीचे राहूल गांधी हांचेरूच मुखेलपणान निशाणो सादला. ताका लागून सहाजिकूच काँग्रेसी भितर खवदळ पडला आनी ते अपेक्षितूच आशिल्लें. राहूल गांधी हांच्या फुडारपणा खाला ‘इंडी’ आघाडीक आतां राजकी फुडार ना होच संदेश ममतादिदीक अप्रत्यक्षपणान काय जायना दिवपाचो आसा. वेगळ्यावेगळ्या राज्यांतल्या विधानसभा वेंचणुकां मजगतीं आघाडी भितर वयर सरिल्लो मतभेद, राहूल गांधी हांणी आपल्या घटक पक्षांक एकठांय बांदून दवरपाक आयिल्लें अपेस हाचेरूच मुखेलपणान ममता बॅनर्जी हांचो रोख दिसून येता, आनी हें अशेंच चालू उरत जाल्यार हाताक कांयच लागप शक्य ना. सेगीत वजाबाजीचें राजकारण करत रावपाची वेळ येतली हें समजून घेवन ममतादिदींनी हो पवित्रो घेतिल्लो दिसता.
गोंया सावन महाराष्ट्रा मेरेन आनी उत्तर प्रदेशा सावन दिल्ली मेरेन विरोधी ‘इंडी’ आघाडीत जी कितें बजबजपुरी चल्ल्या ती पळयत जाल्यार भारतीय जनता पक्षाचेंच ताका लागून फावलां, आनी मुखारूय फावतलें अशें म्हणूंक येतलें. लोकसभेचे वेंचणुके वेळार एकठांय आयिल्ले विरोधी पक्ष आयज सगल्याच राज्यांनी वेगळ्यावेगळ्या दिशांनी तोंड करून उबे आशिल्ल्याचें चित्र दिसता. राहूल गांधी हांकां ताचें कांयच पडून गेल्लें जाणवना. आतां प्रियांका वाड्रा ह्यो लेगीत केरळांतल्या वायनाड मतदारसंघांतल्यान संसदेंत दाखल जाल्ल्यान एक वर्तूळ पुराय जालां. सोनिया, राहूल आनी प्रियांका ह्या तिगांचोय संसदगृहांत प्रवेश जाल्ल्यान काँग्रेसीक आनीक कसली आयज गरज आसा अशें दिसून येना. ताका लागून देशांत हेर कडेन काँग्रेस पक्षाची आवतिकाय कितें जाल्या हाचे कडेन राहूल गांधी वा तांच्या चौकडीतल्या कोणाकूच कितें देणेघेणे आसा अशें दिसून येना. हरयाणा फाटोफाट महाराष्ट्रा सारकें प्रगत राज्यूय व्हगडावपाची वेळ काँग्रेस आनी तांच्या इश्ट पक्षांचेर आयली. हाचे फाटलें मुखेल कारण म्हणल्यार राहूल गांधी हांचें वांझोटें फुडारपण हातूंत कसलोच दुबाव बाळगुपाचें कारण ना. ममता बॅनर्जी हांकां विरोधी आघाडीचें अस्तित्व तिगोवन दवरपाचे आसा हें तांच्या सद्या तांणी घेतिल्लो पवित्रो पळयत जाल्यार ठळकपणान जाणवता. शरद पवारांचो राष्ट्रवादी काँग्रेस पक्ष आसूं वा उबाठाची शिवसेना आसूं, तांणीय ममतादिदींच्या ‘हां’ त ‘हां’ मेळोवपाचें काम केल्ल्यान काँग्रेस पक्षांत ताका लागून नेमकें कसली प्रतिक्रिया उमठता हाचे कडेन सगल्या देशाचें लक्ष लागून उरलां.
महाराष्ट्र राज्य विधानसभा वेंचणुके वेळार आपूणच व्हडलो भाव आशिल्ले भशेन न्हय तर तसो दावो करून काँग्रेसीन शंबरा वयर सुवातो आपल्याक घेतिल्ल्यो. पूण निकाला उपरांत मात मतदारांनी तांच्या आंगा वेले सगलेच कपडे काडून घेतिल्ल्याचें चित्र मुखार आयलें. नाना पाटोळेन आपली लंगोटी तितली शाबूत दवरली. आयज विरोधी पक्ष फुडारीपदा खातीर भाजपा कडेन हात पसरून भीक मागपाची वेळ पाटोळे, उबाठा आनी शरद पवार हांचेर आयल्या. आतां हाचे उपरांतूय हे पक्ष एकठांय रावतले अशें कोणाक दिसता आसत जाल्यार तें चुकीचें थारतलें. उद्धव ठाकरे हांकां आतां काँग्रेसीचो सांगात नाकासो जाला, आनी मुंबय म्हापालिकेचे वेंचणुकेंत स्वबळारूच मैदानांत देंवप अदीक फायाद्याचें थारतलें अशें ठाम मत जालां. काँग्रेस पक्षाचो ‘हात’ सोडपाचे संकेतूय तांणी दिल्यात. अशे फाटभुंयेर ‘इंडी’ आघाडीच्या कथीत एकवटाक एकाफाटोफाट जी वेंर वचूंक लागल्या ती पळत जाल्यार राहूल गांधी हांणी आघाडीचें फुडारपण हाचे मुखारूय चालू दवरचें अशें आघाडीतल्या खूबशा पक्षांक दिसना हें सत. शदर पवार आसूं वा तांची धूव सुप्रिया सुळे हांकांय ममता दिदी ह्योच विरोधी आघाडीचे फुडारपण करपाक सक्षम आसात अशें दिसता. अशे परिस्थितींत राहूल गांधी हांकां ‘इंडी’च्या फुडारपणा वेल्यान कुशीक काडपाच्या यत्नाक चालना मेळटली अशीं स्पश्ट चिन्नां दिसतात. पूण काँग्रेसीच्या खूबशा फुडार्यांक राहूल गांधी बगर आघाडीच्या फुडारपणा खातीर हेर कसलोच पर्याय ना अशें दिसता आनी सहजतायेन राहूल गांधी ह्या पदा वेल्यान कुशीक सरतले अशी आस्तूय बाळगूंक येवची ना. हातूंतल्यान ही गुंतागूंत आनीक वाडपाचो घात आसा.
दोन म्हयन्यां भितर दिल्ली विधानसभेची वेंचणूक जावपाची आसा. ‘इंडी’ आघाडी एकामतान मैदानांत देंवपाची मात लेगीत शक्यताय ना. काँग्रेस आनी आम आदमी हे आघाडीतले दोनूय पक्ष एकामेकां आड झुजपा खातीर तयार जाल्यात. महाराष्ट्र विधानसभा वेंचणुकेंत आम आदमी पार्टीन एकूय सुवात लडोवंक ना हें मान्य केले उपरांतूय थंयच्या एकाय प्रचारसभेक अरविंद केजरीवाल हांणी संबोधीत करूंक ना हें अजाप दिसता. महाराष्ट्रांतल्या महाविकास आघाडीतली फूट आमदारांच्या सोपूतविधी वेळार समाजवादी पक्षान घेतिल्ले रोखठोक पवित्र्याक लागून अदिकूच स्पश्ट जालां. महाविकास आघाडींतल्यान आमी भायर सरतात अशें अबू आझमी हांणी सांगून आघाडीत नेमकें कितें चल्लां हेंच दाखोवन दिलां. लोकसभा वेंचणुकेंत उबाठाचे शिवसेनेक तांचे अपेक्षे परसूय ज्यो चड सुवातो मेळ्ळ्यो त्यो आमच्या तेंक्याक लागूनच हेंवूय सांगपाक आबू आझमी विसरले नात. उद्धव ठाकरे हांकां आतां परतून हिंदुत्वाची याद जावची हेंवूय समाजवादी पक्षाच्या पचनाक पडिल्लें दिसना. फुडारांत ही वेंर आनिकूय वाडत वचूंक शकता. थंय उत्तर प्रदेशांतूय काँग्रेस आनी समाजवादी हांचे भितरलें नातें पयलीं भशेन उरिल्लें ना. आघाडीचें फुडारपण करपी काँग्रेसीक म्हणल्यार पर्यायान राहूल गांधी हांकां आघाडीतलो एकवट तिगोवन दवरपा खातीर खूब कितें करूंक येतालें. पूण तें तांच्या पलतडचें थारलें. हीच संद सादून ममतादिदी ‘इंडी’ आघाडीचें फुडारपण करपाक मुखार सरल्यात. आतां हें करतना आघाडीत अजून अदीक बिघाडी जावची न्हय इतलीच प्रार्थना कांय विरोधी पक्ष करीत आसात.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
