भांगरभूंय | प्रतिनिधी
फोंडें: मोलें पंचायत वाठारांत पुर्तुगेज काळा सावन चालू आशिल्लें गोरवां सांबाळ खात्याचें धाट फार्म स्थलांतरीत करपाच्या हालचालींक नेट आयला. धाट फार्मांत आशिल्ल्या गोरवांक तशेंच कामार आशिल्ल्या कामगारांक बेगिनूच कोपड्डें – वाळपयच्या फार्मांत स्थलांतरीत करतले. फार्म स्थलांतरीत करपा फाटल्यान सुमार 5-6 लाख चौखण मिटर जमनी पोंदा उच्च दर्ज्याचो मीन म्हाल आशिल्ल्यान सरकाराचो ते जमनीर दोळो आसा, असो दुबाव थळाव्या लोकांनी उक्तायला.
धाट फार्म वाठारांत सुमार 5-6 लाख चौखण मिटर जमीन आसा. तातूंत सुमार 290 गोरवांची देखरेख करतात. फाटल्या कांय वर्सां सावन फार्मांतल्या गोरवांची संख्या उणी जाता. सुमार 40- 45 कामगार थंय काम करतात. दर दिसा सुमार 150- 200 लिटर दुदाचें संकलन करतात. फार्माचें स्थलांतर करपाचें आशिल्ल्यान थळाव्या लोकां मदीं कांय प्रमाणांत दुगदूग निर्माण जाल्या. गोंय सरकार जमीन पडीक दवरूं नाकात, अशें सेगीत सांगता. शेतकारांक विवीध सवलती दिता. पूण धाट फार्माची कितलीशींच चौखण मिटर जमीन पडीत दवरल्या. हे आदीं कांय संस्थांनी ती जमीन भाड्याक घेवन शेतां कसपाचो विचार केल्लो, पूण सरकारान ती जमीन भाड्याक दिवपाक न्हयकार दिल्लो. ताका लागुन ती जमीन तशीच पडून आसा. म्हत्वाचें म्हणल्यार ते जमनी पोंदा उच्च दर्ज्याचो मीन म्हाल पडून आसा. ताची खूबश्या राजकी लोकांक खबर आसा. ह्या मीन म्हाला खातीर धाट फार्माचें स्थलांतर करपाच्यो हालचाली चल्ल्यात, अशी चर्चा गांवांत चल्ल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
