भांगरभूंय | प्रतिनिधी
रस्तो बांदपाक दोंगर कातरपा आडूय ग्रामसभेंत तिडक
भांगरभूंय | प्रतिनिधी
कुडचडें: असोल्डें पंचायतीन आपयिल्ले विशेश ग्रामसभेंत कोळसो येरादारी करपाच्या हेतान असोल्ड्यां उबारपा आशिल्ले प्रस्तावीत जेटीक थळाव्या लोकांनी खर विरोध केलो. ग्रामसभेन 2011 त दिनार तारकार प्रा. लि. कंपनी शेळवण सावन लोखंडाची येरादारी करपाक जेटी वापरतात. हाचे भायर कोस्टल रेग्युलेशन झोन वाठारांत खंयचेच जेटी खातीर ना हरकत दाखलो जारी करूंक ना आनी राष्ट्रीय हरीत न्यायाधिकरण आनी हेर न्यायालयाचे आदेश खर पाळपाचें सुनिश्चीत करपाचे थाराव मांडले.
जेटी प्रकल्पा खातीर 80 मिटर रुंद रस्तो बांदपाक गरजेचो आसा. हे खातीर व्हड प्रमाणांत दोंगर कापपा आडूय ग्रामस्थांनी तिडक उक्तायली. तांणी पर्यावरणाचो इबाड आनी भौशीक भलायकेच्या धोक्यांचेर उजवाड घातलो. जातूंत अश्या घडामोडींचो आस्पाव आसा. हे बसकेक शेकड्यांनी गांवकार हजर आशिल्ले.
आदित्य देसाय हांणी गांवच्या लोकांच्या हुस्क्याचेर भर दिलो. असोल्डेंच्या लोकांनी एकवटान जेटी आनी ताचे कडेन संबंदीत रस्तो रुंदीकरण प्रकल्पाक विरोध केलो. कोळशाची येरादारी करपा खातीर हे नियोजीत जेटीक लागून समाजाची भलायकी धोक्यांत येतली आनी हवेचेंय प्रदुशण जातलें. भोपाळाक जाल्ले गॅस घडणूक आमी असोल्ड्यां जावपाक दिवचे नात. कोळसो येरादारी आमच्या पर्यावरणा खातीर आनी फुडले पिळगे खातीर धोक्याची थारतली. ग्रामसभेचे निर्णय अशा व्हड उद्देगीक प्रकल्पांचे पर्यावरण आनी भलायकेचेर जावपी परिणामां विशीं वाडपी हुस्को उक्तायतात. वेवसायीक हीत संबंदां परस भोंवतणचो वाठार सुदारपाचेर प्राधान्य दिवपा विशीं अधिकार्यांक संदेश दिवन गांवच्या लोकांनी तांचे आड ठाम रावपाचो निर्णय घेतलो. असोल्डेंचे सरपंच कुस्तोदियो फर्नांडीस आनी सातूय पंचांचो ह्या प्रकल्पाक विरोध आसा. आमदार निलेश काब्राल हांणी सांगलें, आमी लोकां वांगडा आसा. आमी ह्या प्रकल्पा खातीर दोन तीन सुवातांची पळोवणी केली. आदले सरपंच मनोज नायक हांणी सांगलें, आयज ह्या प्रकल्पाक थळाव्यांनी नेटान विरोध केला. आमचो प्रकल्पाला विरोध ना आनी सरकाराच्या आड आमी वचनात. लोकांक त्रास जावचे ना अशे सुवातेर हो प्रकल्प घालचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
